Úleskerlerdiń quqyqtaryn qorǵaýǵa baǵyttalǵan jańa sharalar halyqtyń qurylys kezeńindegi turǵyn úidi satyp alýǵa qyzyǵýshylyǵyn arttyrady. Bul týraly Ortalyq kommýnikatsiialar qyzmetindegi brifingte Qurylys jáne turǵyn úi-kommýnaldyq sharýashylyq isteri komitetiniń tóraǵasy Baqytjan Júnisbekov málimdedi, dep habarlaidy Dalanews.kz.
Úlestik qurylystyń artyqshylyqtary
Júnisbekovtiń aitýynsha, úlestik turǵyn úi qurylysy tutynýshylar úshin tiimdirek, sebebi qarajat qurylys kezeńinde tartylyp, osynyń arqasynda qurylysshylar men ýákiletti kompaniialar sharshy metrdi tómen baǵamen usynady.
"Úleskerlerdi qorǵaý tetikterin engizý qarajattyń zańsyz tartylýyna jol bermeidi jáne nysandardyń aiaqtalýyna, salynǵan qarajattyń qorǵalýyna satyp alýshylardyń senimin arttyrady. Qurylysqa qarjy salǵan barlyq úleskerler nysandardyń aiaqtalatynyna jáne qarajattarynyń saqtalatynyna senimdi bola alady", – dedi ol.
Komitet tóraǵasy qarjylandyrýdyń ashyqtyǵy men úleskerlerdi qoldaý ortalyǵy arqyly qarajat tartýǵa berilgen ruqsattar men bastapqy-quqyqtyq qujattar týraly aqparattyń qoljetimdiligi tutynýshylar senimin arttyryp, aldaǵy jyldary úlestik turǵyn úige suranystyń ósýine jaǵdai jasaitynyn atap ótti.
Aita keteiik, maýsym aiynda prezident Qasym-Jomart Toqaev Qazaqstanda úlestik turǵyn úi qurylysyna qatysty erejelerdi qatańdatatyn zańǵa qol qoiǵan edi. Qujat úlestik qurylystaǵy zańdylyq pen ashyqtyqty qamtamasyz etýge, úleskerlerdiń quqyqtary men zańdy múddelerin qorǵaýǵa baǵyttalǵan. Onda salynyp jatqan turǵyn úilerge qatysty aldyn ala kelisimsharttar jasasýǵa tyiym salý qarastyrylǵan.
