Qazir Qazaqstanda 14 jasqa deiingi balalardy turǵylyqty jeri boiynsha mindetti tirkeý qarastyrylmaǵan. Osy erejeniń saldarynan eldegi naqty halyq sanyn esepke alýda qiyndyqtar týyndap otyr. Osyǵan bailanysty Ishki ister ministrligi bul normany alyp tastap, ata-analardy balany týǵan sátten bastap tirkeýge mindetteý jóninde bastama kóterdi. Tiisti buiryq jobasy qazir ashyq talqylaýǵa shyǵarylǵan, dep habarlaidy Dalanews.kz.
Túsindirme jazbada 2020 jyldan bastap Ulttyq statistika biýrosynda 14 jasqa deiingi balalarǵa qatysty mekenjai derekteri joq ekeni aitylǵan. Bul jaǵdai eldegi demografiialyq ahýaldy tolyq qamtityn naqty málimetterdi qalyptastyrýǵa kedergi keltirip otyr. Jańa ereje qabyldanǵan jaǵdaida, bul derekter balanyń týýynan keiin birden tirkelip otyrady.
Tirkeý úshin balanyń jeke basyn kýálandyratyn qujattardyń biri qajet bolady, mysaly — týý týraly kýálik. Jańa tártip boiynsha tirkeýge jatatyn jas shegi 16 jasqa deiin dep belgilenip otyr.
Sonymen qatar, joba aiasynda «Azamattarǵa arnalǵan úkimet» memlekettik korporatsiiasy qyzmetkerleriniń jeke kýálik pen pasport berýge qatysty ókilettigi bekitiledi. Mundai tásil pilottyq rejimde synaqtan ótken. IIM málimetinshe, bul tájiribe kóshi-qon bólimderindegi kezekti azaityp, qyzmetkerlerge túsetin júktemeni jeńildetken.
Budan bylai korporatsiia qyzmetkerleri memlekettik fýnktsiialardy oryndaýǵa ýákiletti tulǵalarmen teńestiriledi, bul azamattardy qujattandyrý protsesine olardyń qatysý aiasyn keńeitýge múmkindik beredi.
Ministrlik bul ózgerister eshqandai teris saldarǵa ákelmeitinin, kerisinshe azamattardyń memlekettik qyzmetterge qoljetimdiligin arttyrýǵa baǵyttalǵanyn atap ótti.
