Sý resýrstary jáne irrigatsiia ministrligi, Qazaqstandaǵy BUU Damý baǵdarlamasy (BUUDB) jáne Eýraziialyq damý banki (EADB) «Qazaqstandaǵy turaqty irrigatsiia úshin biznes ekojúieni damytý» jobasy boiynsha úshjaqty kelisimge qol qoidy. Jobany iske asyrýǵa EADB 5,3 mln dollar kóleminde grant bóledi, dep habarlaidy Dalanews.kz.
Qarjylyq kelisimge Sý resýrstary jáne irrigatsiia ministri Nurjan Nurjigitov, Qazaqstandaǵy BUUDB Turaqty ókili Katarjina Vavernia jáne EADB basqarma tóraǵasynyń orynbasary Rýslan Dalenov qol qoidy.
Bul joba birneshe jylǵa josparlanǵan. Onyń aiasynda Ulttyq sý resýrstary aqparattyq júiesin qurý, sý boljamy jáne tiimdi bólý quraldaryn engizý, zamanaýi irrigatsiianyń óńirlik ortalyqtaryn qalyptastyrý, mamandardyń biliktiligin arttyrý, sondai-aq sý únemdeý tehnologiialaryn engizý kózdelgen.
«Bul bastama Qazaqstannyń irrigatsiia júiesin damytýǵa jáne sýdy tiimdi paidalanýdy arttyrýǵa baǵyttalǵan. Bizdiń bul jobaǵa qatysýymyz sý sharýashylyǵyn jańǵyrtý jáne klimattyq ózgeristerge beiimdelý jónindegi strategiialyq maqsattarymyzdy júzege asyrýǵa múmkindik beredi. Memleket basshysynyń tapsyrmasyna sáikes biz elimizdiń sý salasyna investitsiia tartý boiynsha belsendi jumys júrgizip kelemiz. Alaida barlyq strategiialyq sheshim tek Qazaqstanda qabyldanady jáne solai qala beredi de. Sondai-aq sý resýrstary men nysandaryn shet memleketterdiń qoldanysyna berý máselesi eshqashan qaralǵan emes. Basty maqsatymyz – azamattarymyzdyń múddesin qorǵaý, elimizdiń qaýipsizdigi men turaqty damýyn qamtamasyz etý úshin sý sektoryn jańǵyrtý», – dedi Sý resýrstary jáne irrigatsiia ministri Nurjan Nurjigitov.
