2024 jyly kórsetilgen tis dárigerleri qyzmetteriniń kólemi 209,9 mlrd teńgeni qurady. Bul ótken jylmen salystyrǵanda 1,5 ese kóp, ári sońǵy bes jyldaǵy eń joǵary kórsetkish boldy, dep habarlaidy Dalanews.kz.
“2024 jyly stomatologiialyq qyzmetter kólemi 209,9 mlrd teńgege jetti. Bul kórsetkish buryn-sońdy bolmaǵan rekord qoiyp, keminde bes jyldaǵy eń joǵary deńgeige jetti”, – delingen Birinshi nesie biýro habarlamasynda.
Biýro málimetinshe, 2021 jáne 2022 jyldary stomatologiialyq klinikalar tabysy jyl saiyn eki esege jýyq ósip otyrdy. Sońǵy tórt jylda bul salada qarqyndy ósim baiqalsa, 2023 jyly birshama tómendeý tirkelgen.
"2024 jyly stomatologiialyq qyzmetter kóleminiń kúrt ósýi zeinetaqy jinaqtaryn sheship alýǵa shekteý qoiý jáne jumys isteitin zeinetkerlerge biýdjetten tólemderdi toqtatý týraly usynystar aiasynda baiqaldy. Bul bastamalar qabyldanǵan joq, biraq zeinetaqy qorynan qarajat alýǵa qatysty úrei qazaqstandyqtardy alańdatqany anyq", – dep atap ótti biýro ókilderi.
Qazaqstanda stomatologiialyq qyzmetterdiń 80%-y halyqtyń jeke qarajaty esebinen tólenedi. Saladaǵy tabystyń artýyna baǵanyń kóterilýi de yqpal etti. 2021–2024 jyldary stomatologiialyq qyzmetterdiń quny jylyna orta eseppen 11,5%-ǵa qymbattap, 2022 jyly eń joǵary ósim – 18,3% tirkeldi.
