Qazaqstanda temeki ónimderiniń eń tómengi bólshek saýda baǵasy ósti. Bul týraly Qazaqstan Respýblikasynyń Qarjy ministrligi bekitken buiryqta kórsetilgen, dep habarlaidy Dalanews.kz.
2025 jylǵy shildede Qarjy ministri 2022 jylǵy 22 aqpandaǵy №196 «Súzgisi bar jáne súzgisiz temekilerge, papirosalarǵa, sigarillalarǵa jáne qyzdyrylatyn temeki ónimderine eń tómengi bólshek saýda baǵalaryn belgileý týraly» buiryqqa ózgerister engizgen bolatyn.
Jańa qujatqa sáikes, 2026 jylǵy 1 qańtardan bastap 20 dana súzgisi bar nemese súzgisiz temekilerge, papirosalarǵa, sigarillalarǵa jáne qyzdyrylatyn temeki ónimderine arnalǵan eń tómengi bólshek baǵa 970 teńge bolyp belgilendi.
Al 2025 jylǵy 1 shilde men 31 jeltoqsan aralyǵynda bul kórsetkish 920 teńge bolǵan.
Sonymen qatar 2026 jyldan bastap Qazaqstanda jańa Salyq kodeksi aiasynda barlyq qoldanystaǵy aktsiz mólsherlemeleri 10 paiyzǵa artady. Bul talap temeki ónimderine de qatysty.
Osylaisha, 2026 jyly temekige salynatyn aktsiz mólsherlemesi 1000 danaǵa 18 051 teńge bolady. Al aldaǵy jyldary bul kórsetkish kezeń-kezeńimen ósip, 2030 jylǵa qarai 1000 temeki úshin 25 607 teńgege jetedi.
