Qazaqstanda ymdaý tiliniń mártebesi zań júzinde bekitilýi múmkin. Bul túzetýlerdi Májilistiń jumys toby qoldady, dep habarlaidy dalanews.kz.
Ymdaý tiline resmi mártebe berý bastamasy Májiliste estý jáne sóileý qabileti buzylǵan adamdardy qoldaýǵa arnalǵan zań jobasy aiasynda talqylanyp jatyr.
Depýtattardyń málimetinshe, búginde Qazaqstanda estý jáne sóileý qabileti buzylǵan 30 myńnan astam adam turady. Olardyń shamamen 5 myńy – balalar. Kópshiligi úshin ymdaý tili – tolyqqandy qarym-qatynas jasaýdyń jalǵyz múmkindigi. Alaida bul til áli kúnge deiin zań júzinde naqty bekitilmegen.
Májilis depýtaty Ekaterina Smoliakovanyń aitýynsha, depýtattar usynǵan túzetýlerdi Úkimet qoldaǵan. Al Májilistiń jumys toby bul bastamaǵa biraýyzdan daýys bergen.
"Qurǵaq sandardyń artynda árdaiym naqty adamdardyń taǵdyry turady. Adam aýrýhanada oiyn jetkize almaidy. Qyzmet ala almaidy. Onyń sózi estilmeidi. Árine, bul áli sońǵy sheshim emes. Biraq ymdaý tili resmi mártebe alatyn bolsa, bul óte mańyzdy qadam bolady", – dedi Smoliakova.
Depýtattyń sózinshe, bul bastama tek tildi simvolikalyq túrde moiyndaý emes. Áńgime bilim alý, meditsinalyq kómek, memlekettik qyzmetter, sot júiesi jáne aqparatqa qol jetkizý siiaqty negizgi quqyqtar týraly bolyp otyr.
Bastamany depýtat Nurgúl Taý kótergen. Bul másele Qazaqstan sańyraýlar qoǵamynyń ótinishinen keiin talqylaýǵa shyqqan. Qoǵam ókilderi sýrdoaýdarmanyń, beiimdelgen kontenttiń jetkiliksiz ekenin jáne estý qabileti buzylǵan adamdardyń kúndelikti ómirde kóptegen qiyndyqqa tap bolatynyn aitqan.
