Mádeniet jáne aqparat vitse-ministri Evgenii Kochetov Qazaqstanda sheteldik ártisterdiń kontsertteri qandai jaǵdaida toqtatylýy nemese tyiym salynýy múmkin ekenin túsindirdi, dep habarlaidy Dalanews.kz.
Onyń aitýynsha, bul tsenzýra da emes, «qara tizimder» de emes. Qazaqstan sheteldik oryndaýshylar úshin ashyq el bolyp qala beredi, sóz bostandyǵy saqtalady. Alaida kontsert uiymdastyrý tártibi ózgeredi.
Buǵan deiin ártister nemese olardyń komandalary aldymen alań taýyp, bilet satýdy bastap, tek sodan keiin ǵana qujattardy rásimdeýge kirisetin. Sonyń saldarynan ákimdikter men tiisti vedomstvolar kontsertter týraly kóbine keiin bilip jatatyn, biletter satylyp ketken soń, áleýmettik jelilerden kóretin. Kochetov mundai tájiribeni durys emes dep atady.
Endi jańa tártip engiziledi. Aldymen resmi kelisimshart jasalady, keiin jergilikti bilikpen kelisý júrgiziledi, tek sodan soń ǵana bilet satylymy bastalady. Osylaisha memlekettik organdar kim keletinin, qandai baǵdarlamamen jáne qandai sharttarmen óner kórsetetinin aldyn ala biletin bolady.
Kelisimsharttarda ártistiń mindettemeleri naqty kórsetiledi. Eń bastysy, kontsert barysynda el zańdaryn buzatyn kontent bolmaýy tiis: esirtkini nasihattaý, pornografiia, memlekettik qurylymǵa qarsy úndeýler nemese ózge de tyiym salynǵan taqyryptar.
Eger repertýarda daýly shyǵarmalar bolsa, ártiske olardy Qazaqstan sahnasynda oryndamaý jóninde usynys beriledi. Osy talaptar saqtalǵan jaǵdaida kontsert ótkizýge eshqandai kedergi bolmaidy.
