Qazaqstanda shetel azamattaryna arnalǵan QazETA mobildi qosymshasy ázirlenip jatyr. Onyń kómegimen birqatar kóshi-qon qyzmetterin onlain rásimdeýge, sonyń ishinde smartfon arqyly jeke sáikestendirý nómirin (JSN) alýǵa múmkindik beriledi, dep habarlaidy dalanews.kz.
Bul týraly ishki ister ministri Erjan Sádenov málimdedi.
Ministrdiń aitýynsha, atalǵan qyzmetterdi iske qosýǵa qajetti zańnamalyq túzetýler qazir Senattyń qaraýynda jatyr.
Sondai-aq Erjan Sádenov halyqaralyq áýejailar men iri shekaralyq ótkizý beketterinde shetel azamattaryna QR-kody bar týristik kartalar berilip jatqanyn aitty. Kartada Qazaqstanda bolý erejeleri, tótenshe jaǵdai qyzmetteri men uialy bailanys operatorlary týraly aqparat qamtylǵan.
Jańa qosymsha sheteldikterge memlekettik qyzmetterdi qashyqtan alýdy jeńildetip, elge kelýshiler úshin rásimderdi tsifrlandyrýǵa múmkindik beredi.
