Qazaqstanda qoi etiniń baǵasy bir jyl ishinde 27,9%-ǵa ósti. Shilde aiynda onyń ortasha quny bir kilogramyna 4,5 myń teńgege jetken. Bul – negizgi et túrleri arasyndaǵy eń joǵary ósim, dep habarlaidy dalanews.kz.
"Za nami ýje vyehali" telegram arnasynyń málimetinshe, qoi eti Astana turǵyndaryna eń qymbatqa túsken. Elordada onyń bir kilogramy orta eseppen 5,4 myń teńgeden satyldy. Al eń tómen baǵa Kókshetaýda tirkelip, kelisine 3,8 myń teńgeni qurady.
Kóktemde Aýyl sharýashylyǵy ministrligi baǵanyń kóterilýin Qurban ait qarsańyndaǵy maýsymdyq suranyspen túsindirgen edi. Alaida mereke aiaqtalǵannan keiin de qoi eti arzandaǵan joq. Kerisinshe, mamyrda baǵa birden 4,7%-ǵa ósti. Bul – keminde 2011 jyldan bergi eń joǵary ailyq kórsetkish. Maýsymda qoi eti taǵy 4,2%-ǵa, shildede 2,3%-ǵa qymbattady.
Basqa et túrleriniń baǵasy da aitarlyqtai ósken. Bir jylda siyr eti 15,1%-ǵa, jylqy eti 14,4%-ǵa, shoshqa eti 11,3%-ǵa qymbattady. Jalpy, elimizdegi et baǵasy orta eseppen 15,8%-ǵa kóterildi.
Baǵanyń mundai qarqynmen ósýi et óndirisi rekordtyq deńgeige jetken tusta baiqalyp otyr. Biylǵy jeti aida Qazaqstanda 48,2 myń tonna balǵyn jáne salqyndatylǵan et óndirilgen. Bul – 1999 jyldan beri osy kezeńde tirkelgen eń joǵary kórsetkish.
