Qazaqstan Respýblikasy Mádeniet jáne aqparat ministrligi «Qala hikaialary» atty jańa respýblikalyq ádebi baiqaýdy jariialady. Proza janryna arnalǵan baiqaý qazirgi Qazaqstan qalalarynyń tynys-tirshiligin kórkem shyǵarmalar arqyly beineleitin jańa esimderdi anyqtaýǵa jáne qoldaýǵa baǵyttalady. Baiqaýǵa qatysýshylarǵa qala mádenieti, adam taǵdyry, qoǵamdaǵy ózgerister, sondai-aq ulttyq bolmys pen zamanaýi qundylyqtardyń sabaqtastyǵy taqyryptaryn kórkem týyndylar arqyly jetkizý usynylady, dep habarlaidy dalanews.kz.
Ádebi baiqaýǵa Qazaqstan Respýblikasynyń azamattary qatysa alady. Qatysý úshin kólemi keminde 10 avtorlyq baspa tabaq (bir avtorlyq baspa tabaqtyń kólemi 40 myń baspa tańbasyn quraidy) bolatyn, buryn esh jerde jariialanbaǵan qala taqyrybyndaǵy romandar qabyldanady. Ár avtor bir ǵana shyǵarmasyn usyna alady.
Jeńimpazdardy belgili jazýshylar men qoǵam qairatkerlerinen quralǵan qazylar alqasy anyqtaidy. Qorytyndy sheshim ashyq daýys berý arqyly qabyldanady.
Baiqaý qorytyndysy boiynsha úzdik shyǵarmalardyń avtorlary diplomdarmen jáne aqshalai syilyqtarmen marapattalady. Sonymen qatar júldeli oryn alǵan týyndylar 15 myń danamen basylyp, elimizdiń kitaphanalaryna taratylady.
Respýblikalyq baiqaý erejesine sáikes, jeńimpazdarǵa mynadai syiaqylar belgilengen:
- Bas júlde – 100 myń AQSh dollary;
- I oryn – 75 myń AQSh dollary;
- II oryn – 50 myń AQSh dollary;
- III oryn – 30 myń AQSh dollary.
Baiqaý jumystary 2026 jylǵy qyrkúiek pen jeltoqsan ailary aralyǵynda qabyldanady. Qujat Astana qalasy, Máńgilik El dańǵyly, 8, 14-kireberis, Qazaqstan Respýblikasy Mádeniet jáne aqparat ministrliginiń mekenjaiy boiynsha ótkizilýi qajet.
Baiqaýǵa qatysý sharttary týraly qosymsha aqparatty +7 (7172) 74 04 07 jáne +7 (7172) 74 04 08 telefon nómirleri arqyly alýǵa bolady.
