2026-2027 oqý jylyna Qazaqstannyń joǵary oqý oryndarynda bilim alý úshin 550 sheteldik talapkerge memlekettik bilim granty bólindi, dep habarlaidy dalanews.kz.
Ǵylym jáne joǵary bilim ministrliginiń málimetinshe, memlekettik stipendiialyq baǵdarlama aiasyndaǵy konkýrstyq irikteý aiaqtalyp, grant iegerleriniń negizgi tizimi bekitildi. Baǵdarlama Qazaqstan azamaty bolyp tabylmaityn etnikalyq qazaqtarǵa da arnalǵan.
Biyl 490 grant bakalavriatqa, 50 grant magistratýraǵa jáne 10 grant doktorantýraǵa bólindi.
Konkýrsqa álemniń 71 elinen 16 098 talapker qatysqan. Olardyń edáýir bóligin qandastar qurady.
Baǵdarlamaǵa elimizdiń 27 joǵary oqý orny qatysyp, talapkerlerge 886 bilim berý baǵdarlamasyn usyndy. Grant iegerleriniń basym bóligi Sh.Ýálihanov atyndaǵy Kókshetaý ýniversitetinde, Astana IT University-de, Q.I.Sátbaev atyndaǵy Qazaq ulttyq tehnikalyq zertteý ýniversitetinde, L.N.Gýmilev atyndaǵy Eýraziia ulttyq ýniversitetinde jáne Abylai han atyndaǵy Qazaq halyqaralyq qatynastar jáne álem tilderi ýniversitetinde bilim alady.
Biyl baǵdarlamaǵa qatysýshy elderdiń sany aitarlyqtai artty. Eger 2025 jyly grant iegerleri 26 memleketten bolsa, biyl bul kórsetkish 49 elge jetti. Eń kóp ótinim Palestina, Indoneziia, Resei, Ózbekstan jáne Aýǵanstan azamattarynan túsken.
Biyl alǵash ret AQSh, Italiia, Germaniia, Maldiv Respýblikasy jáne Koreia Respýblikasynyń azamattary da memlekettik stipendiia iegerleri qataryna endi.
Ministrlik bul baǵdarlamanyń Qazaqstannyń Ortalyq Aziiadaǵy bilim berý ortalyǵy retindegi halyqaralyq bedelin nyǵaitýǵa jáne sheteldik stýdentterdi tartýǵa yqpal etetinin atap ótti.
