Qazaqstanda sońǵy on jylda neke qiiý kórsetkishi aitarlyqtai tómendegen, dep habarlaidy dalanews.kz.
Ulttyq statistika biýrosynyń málimetinshe, 2015 jyly elde 148,8 myń neke tirkelse, 2025 jyly bul kórsetkish 116 myńǵa deiin azaiǵan.
Osylaisha, on jyl ishinde tirkelgen neke sany shamamen 22%-ǵa qysqarǵan.
Ulttyq statistika biýrosy Halyqaralyq otbasy kúnine orai eldegi otbasy statistikasyn jariialady.
«2015 jylmen salystyrǵanda tirkelgen neke sany 148,8 myńnan 2025 jyly 116 myńǵa deiin tómendedi. Osylaisha, on jyl ishinde neke sany shamamen 22%-ǵa qysqardy. Sáikesinshe, nekelesý koeffitsienti de tómendedi. Eger 2015 jyly 1000 adamǵa shaqqanda 8,48 neke tirkelse, 2025 jyly bul kórsetkish 5,69 boldy», – delingen biýro habarlamasynda.
Statistikaǵa sáikes, óńirler arasynda eń joǵary nekelesý koeffitsienti Astanada tirkelgen. Elordada 1000 adamǵa shaqqanda 6,75 neke keledi.
Al eń tómen kórsetkishter:
— Qyzylorda oblysynda – 5,06,
— Batys Qazaqstan oblysynda – 5,1 bolǵan.
«Astanadaǵy joǵary nekelesý koeffitsienti jastardyń kóshi-qon belsendiligimen jáne eńbekke qabiletti halyqtyń shoǵyrlanýymen bailanysty bolýy múmkin. Aita ketý kerek, sońǵy 20 jyldaǵy nekelesýdiń sharyqtaý shegi 2012-2013 jyldary boldy. Ol kezde kórsetkish 1000 adamǵa shaqqanda 9,8-9,9 nekeni qurady. Salystyrý úshin aitsaq, 2005 jyly nekelesý koeffitsienti 8,12 bolǵan», – delingen málimette.
Sonymen qatar biýro neke sanynyń azaiýyna demografiialyq faktor áser etip otyrǵanyn atap ótti.
«Neke sanynyń tómendeý faktorlarynyń biri – demografiialyq tolqyn. 1980 jyldardyń sońyndaǵy kóp býynnan keiin neke jasyna 1990 jyldardyń sońynda týǵan urpaq keldi. Al ol kezeńde eldegi týý kórsetkishi aitarlyqtai tómen bolǵan. Sonymen qatar qazaqstandyqtar keshirek úilene bastaǵanyn da atap ótken jón. Sońǵy 10 jylda alǵashqy neke jasy erler arasynda 0,7 jasqa, áielder arasynda 0,6 jasqa ósti. Nátijesinde 2025 jyly bul kórsetkish erlerde 27,9 jas, áielderde 25,3 jas boldy», – dep habarlady biýro.
Buǵan deiin jariialanǵan resmi statistika boiynsha, 2025 jyly Qazaqstanda 45,7 myń ajyrasý tirkelgen. Bul barlyq nekeniń shamamen 39,4%-yna teń.
Ajyrasýlardyń 74,4%-y qalalarda bolǵan. Sonymen qatar barlyq nekeniń 80,4%-y bir etnos ókilderi arasynda qiylsa, 19,6%-y etnosaralyq neke bolǵan.
Sarapshylardyń pikirinshe, jastar arasynda otbasyǵa degen kózqaras ózgerip keledi. Kópshiligi aldymen bilim, mansap jáne qarjylyq turaqtylyqqa basymdyq beredi. Sonymen qatar resmi neke qimai birge ómir súrý tájiribesi de jiilep barady.
Mamandar otbasy institýtyndaǵy ózgerister demografiiaǵa ǵana emes, qoǵamdaǵy áleýmettik turaqtylyqqa da tikelei áser etetinin aitady.
