Qazaqstanda meditsina qyzmetkerleriniń ómiri, densaýlyǵy jáne kásibi jaýapkershiligin saqtandyrý júiesin jetildirý josparlanyp otyr, dep habarlaidy dalanews.kz.
Tiisti túzetýler «Ashyq NQA» portalynda qoǵamdyq talqylaýǵa shyǵaryldy.
Densaýlyq saqtaý ministrliginiń málimetinshe, jańa ózgerister aiasynda biryńǵai saqtandyrý shartyn engizý kózdelgen. Sondai-aq saqtandyrý qorǵanysy internder men rezidentterge de taratylady.
Budan bólek, meditsina qyzmetkerlerine qyzmettik mindetin atqarý kezinde jasalǵan shabýyldar jaǵdaiynda saqtandyrý tólemderin alý quqyǵy naqty kepildendirilmek. Vedomstvo ótemaqy tóleý rásimin de jeńildetýdi josparlap otyr.
Qujatty qoǵamdyq talqylaý 16 qyrkúiekke deiin jalǵasady.
