Qazaqstanda kún saiyn balalarǵa qatysty 5 qylmys faktisi tirkeledi. Ókinishtisi, olardyń kóbi óz jaqyndary tarapynan jasalady. Qylmystardyń aldyn alý qiyn bolyp otyrǵany da osydan. Bul jaiynda QR Bala quqyqtary jónindegi ýákili Dinara Zakieva aityp berdi, dep habarlaidy Dalanews.kz.
«Ókinishke qarai, elimizde kún saiyn balalarǵa qarsy 5 qylmys faktisi tirkeledi. Bul qylmystardyń 60-70%-y óz ata-analary nemese birge turatyn adamdar tarapynan jasalady. Osy qylmystar úide jasalýynyń sebebinen olardyń aldyn alý men anyqtaý óte qiyn. Memleket basshysynyń tapsyrmasymen qabyldanǵan zańdarǵa sáikes, profilaktikaǵa qatysty birneshe mehanizmder engizildi. Ár aýdanda otbasyn qoldaý ortalyqtary ashyldy», - dedi bala quqyqtary jónindegi ýákil «TÚIIN» baǵdarlamasyna bergen suhbatynda.
Aldyn alý jumystarynyń aiasynda byltyr elde 29 myń ata-ana jaýapkershilikke tartylǵan. 1126 ata-ana quqyǵynan aiyrylyp, 661-iniń ata-ana bolý quqyqtary shektelgen. Qolǵa alynǵan sharalardyń nátijesinde balalarǵa qarsy jasalatyn asa aýyr jáne aýyr qylmystardyń sany azaiǵan. Mysaly, 99-bap boiynsha 10%-ǵa, 106-baptyń 3-bólimi boiynsha qylmystardyń sany 54%-ǵa azaidy. Alaida, byltyr Qazaqstanda balalar arasyndaǵy qylmystardyń sany 30%-ǵa ósken.
«Olardyń 70%-y qarjy máselelerine qatysty, 20%-y jeke tulǵaǵa qatysty jasalǵan qylmystar. Osy qylmystar býllingten bastalady. Býllingtiń aldyn alý úshin mektepterde «DosbolLIKE», «Adal azamat» baǵdarlamalary engizildi», - dedi Dinara Zakieva
2025 jyly Qazaqstanda bala quqyǵyn buzýǵa qatysty 171 derek tirkeldi. «111» senim telefonyna 124 600 qońyraý tústi. Byltyr IýNISEF uiymy júrgizgen saraptamalyq zertteýde elimizde bala quqyǵy resmi derekte kórsetilgennen áldeqaida jii buzylatyny anyqtaldy.
«Árine, bul baǵytta jumysty júrgizip, mehanizmdi jetildirý kerek. Sol sebepten «Qazaqstan balalary» baǵdarlamasy aiasynda osy mehanizmderdi jetildirý úshin mamandardy oqytý, qoldaý sonymen qatar olardyń jumysyna standarttardy engizý úshin naqty sharalar kózdelgen. Mysaly, qamqorshy mamandar men psihologtardyń jalaqysy ósedi», - dep qorytyndylady ombýdsmen.
