Kólik ministrligi "Kópir qurylystarynyń monitoring júiesi" atty vedomstvolyq erejeler jinaǵyn ázirlep, bekitti, dep habarlaidy Dalanews.kz.
Qujat alǵash ret kópirlerdiń, jol ótkelderiniń, estakadalar men viadýktardyń tehnikalyq jai-kúiin qadaǵalaityn júielerdi ornatý men paidalanýǵa qatysty talaptardy normativtik deńgeide bekitti.
Monitoring júiesi qurylystardyń naqty jaǵdaiyn tirkep, klimattyq áserdi jáne kólikten túsetin shekten tys júktemelerdi eskeretin bolady.
"QazjolǴZI" dereginshe, búginde Qazaqstanda 3 500-den astam kópir paidalanylyp jatyr, olardyń kóbi qyzmet etý merziminiń sońyna taiaǵan.
"Monitoring júiesin engizý bizge naqty derekterge súiene otyryp sheshim qabyldaýǵa múmkindik beredi. Bul eldiń búkil kólik jelisiniń senimdiligin arttyrýǵa baǵyttalǵan mańyzdy qadam", – dep atap ótti institýt ókilderi.
Buǵan deiin ǵalymdar mobildi diagnostikalyq tehnologiialardy engizgen edi. Olar jasyryn aqaýlardy arnaiy tehnikasyz jáne qozǵalysty toqtatpai-aq anyqtaýǵa múmkindik beredi. Qazirdiń ózinde óńirlerde jańa býyn ólsheý keshenderi qoldanylyp, yqtimal zaqymdardy ornynda tirkeý múmkindigi iske asyrylýda.
Sarapshylardyń baǵalaýynsha, jańa erejelerdi engizý nysandardy kútip ustaýǵa ketetin shyǵyndy azaityp, jol salasynyń jalpy qaýipsizdik deńgeiin kóteredi.
