كولىك مينيسترلىگى "كوپىر قۇرىلىستارىنىڭ مونيتورينگ جۇيەسى" اتتى ۆەدومستۆولىق ەرەجەلەر جيناعىن ازىرلەپ، بەكىتتى، دەپ حابارلايدى Dalanews.kz.
قۇجات العاش رەت كوپىرلەردىڭ، جول وتكەلدەرىنىڭ، ەستاكادالار مەن ۆيادۋكتاردىڭ تەحنيكالىق جاي-كۇيىن قاداعالايتىن جۇيەلەردى ورناتۋ مەن پايدالانۋعا قاتىستى تالاپتاردى نورماتيۆتىك دەڭگەيدە بەكىتتى.
مونيتورينگ جۇيەسى قۇرىلىستاردىڭ ناقتى جاعدايىن تىركەپ، كليماتتىق اسەردى جانە كولىكتەن تۇسەتىن شەكتەن تىس جۇكتەمەلەردى ەسكەرەتىن بولادى.
"قازجولعزي" دەرەگىنشە، بۇگىندە قازاقستاندا 3 500-دەن استام كوپىر پايدالانىلىپ جاتىر، ولاردىڭ كوبى قىزمەت ەتۋ مەرزىمىنىڭ سوڭىنا تاياعان.
"مونيتورينگ جۇيەسىن ەنگىزۋ بىزگە ناقتى دەرەكتەرگە سۇيەنە وتىرىپ شەشىم قابىلداۋعا مۇمكىندىك بەرەدى. بۇل ەلدىڭ بۇكىل كولىك جەلىسىنىڭ سەنىمدىلىگىن ارتتىرۋعا باعىتتالعان ماڭىزدى قادام"، – دەپ اتاپ ءوتتى ينستيتۋت وكىلدەرى.
بۇعان دەيىن عالىمدار ءموبيلدى دياگنوستيكالىق تەحنولوگيالاردى ەنگىزگەن ەدى. ولار جاسىرىن اقاۋلاردى ارنايى تەحنيكاسىز جانە قوزعالىستى توقتاتپاي-اق انىقتاۋعا مۇمكىندىك بەرەدى. ءقازىردىڭ وزىندە وڭىرلەردە جاڭا بۋىن ولشەۋ كەشەندەرى قولدانىلىپ، ىقتيمال زاقىمداردى ورنىندا تىركەۋ مۇمكىندىگى ىسكە اسىرىلۋدا.
ساراپشىلاردىڭ باعالاۋىنشا، جاڭا ەرەجەلەردى ەنگىزۋ نىسانداردى كۇتىپ ۇستاۋعا كەتەتىن شىعىندى ازايتىپ، جول سالاسىنىڭ جالپى قاۋىپسىزدىك دەڭگەيىن كوتەرەدى.
