Qazaqstandyq kólik júrgizýshileri ózderi jasamaǵan quqyqbuzýshylyqtar úshin aiyppul alyp jatqandaryn aityp shaǵymdandy. Sarapshylardyń pikirinshe, bul – jol qozǵalysyn baqylaý kameralarynyń kólik nómirlerin qate tanýyna bailanysty. Mundai jaǵdaida aiyppulmen kelispei, ony joiýǵa bolady, dep habarlaidy Dalanews.kz 31 arnaǵa silteme jasap.
Aisha Qosheman esimdi júrgizýshige jyldamdyqty asyrdy degen aiyppen aiyppul jóninde habarlama kelgen. Alaida onyń aitýynsha, sol kúni ol múlde kólik júrgizbegen.
“Sol kúni qaladan shyqpaǵan soń, eOtinish arqyly ótinish jazdym. Aiyppuldy joiyp berdi, eshteńe tólemedim”, – deidi ol.
Aisha bul máseleni jyldam ári qiyndyqsyz sheshe alǵan. Biraq mundai joly bola bermeitinder de bar. Keide adamdar júikesin qurtyp, ýaqytyn joǵaltyp, mán-jaiǵa úńilmesten, kelgen aiyppuldy birden tólei salady. Al kameralardyń jumys isteý júiesi qatelikten ada emes.
“Elektronika tek naqty syzyqtar men tańbalardy tanýǵa beiimdelgen. Jaryqtyń shaǵylýy nemese basqa faktorlar áser etken jaǵdaida, júie kóliktiń markasyn da elemeidi. Ol nómirdi oqyp, belgili bir formatqa sáikestendirip, kóringen nársege aiyppul sala salady”, – deidi “Jalpy jol” qaýipsiz jol qozǵalysy qaýymdastyǵynyń prezidenti Arsen Shakýov.
Al Ishki ister ministrligi mundai jaǵdailarda qasaqana niet joq ekenin aityp, barlyq daýly máseleler zań sheńberinde sheshiletinin eskertedi.
