Qazaqstanda jyl saiyn 75 myń túsik jasalady. Osyǵan bailanysty emhanalarda áleýmettik osal toptaǵy áielderge tegin kontratseptsiia quraldary berile bastady. Bul týraly Densaýlyq saqtaý ministri Aqmaral Álnazarova málimdedi, dep habarlaidy Dalanews.kz.
"Qazaqstanda jyl saiyn 75 myń túsik jasalady. Zamanaýi otbasyn josparlaý ádisteri bar kezde biz bul kórsetkishti azaitýǵa kúsh salýymyz kerek. Sebebi árbir túsik – áieldiń densaýlyǵy men ómirine tónetin qaýip. Qazirgi tańda emhanalarda áleýmettik turǵydan osal sanattaǵy azamattardy otbasyn josparlaý quraldarymen qamtamasyz etý úshin qajet qarajat bólinýde", – dedi ministr.
Onyń aitýynsha, muqtaj áielder kontratseptsiia quraldaryn meditsinalyq uiymdardyń óz biýdjeti esebinen alady. Al birqatar óńirde bul maqsatqa jergilikti biýdjetten de qarjy bólingen.
Eske salaiyq, buǵan deiin Qazaqstanda keiingi bes jylda 18 jasqa tolmaǵan 12 myńǵa jýyq qyz bala júkti bolǵany belgili bolǵan edi. Bul týraly QR Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiia tóraǵasynyń orynbasary Juldyzai Ysqaqova málimdedi.
Ysqaqova atap ótkendei, jasóspirimder arasynda reprodýktivti densaýlyq týraly jaýapkershilik mádenietin qalyptastyrýǵa arnalǵan sharalar júieli túrde júrgizilip jatyr. Bul jumysqa memlekettik organdar, bilim berý jáne meditsinalyq mekemeler, sondai-aq úkimettik emes uiymdar men halyqaralyq seriktester atsalysýda.
"Bul baǵytta memlekettik organdar, meditsinalyq jáne bilim berý mekemeleri, úkimettik emes uiymdar men halyqaralyq seriktester birlesip jumys isteýde. Alaida, jaýapkershilikti tek mektepterge nemese ata-analarǵa artyp qoiý durys emes. Halyqtyń densaýlyǵy — bul barshaǵa ortaq jaýapkershilik, ol ulttyq igilikke negiz bolarlyq mańyzdy másele", — dep atap ótti ol OKQ alańynda.
Budan bólek, Juldyzai Ysqaqova jastar arasynda AITV týraly aqparattyń jetkiliksiz ekendigin atap ótti.
"Sońǵy bes jylda elimizde 18 jasqa tolmaǵan 12 myńdai qyz bala júkti bolyp qalǵan. 15 pen 19 jas aralyǵyndaǵy jasóspirimderdiń úshten biri jynystyq belsendi, alaida UNFPA zertteýlerine súiensek, olardyń kópshiliginiń AITV men JITS týraly bilimi tómen", — dedi spiker.
