2025 jyly Qazaqstanda janar-jaǵarmai baǵasyna memlekettik retteý alynyp tastalyp, naryqtyq baǵa belgileý júiesine kóshý bastaldy. Alaida áleýmettik mańyzy bar AI-92 benzinine jáne dizel otynyna baǵany ósirmeý týraly moratorii engizilgen edi. Bul shekteý 2026 jyldyń naýryz aiynyń sońyna deiin kúshinde, dep habarlaidy Dalanews.kz Tengrinews.kz-ke silteme jasap.
Energetika ministrliginiń málimetinshe, qazirgi ýaqytta AI-92 benzini men dizel otynyna belgilengen bólshek saýda baǵasynyń dálizi saqtalyp otyr:
- AI-92 benzini – litrine 213–239 teńge,
- dizel otyny – 317–337 teńge aralyǵynda.
Vedomstvonyń aitýynsha, iri janarmai quiý stantsiialarynyń jelilerinde AI-92 baǵasy osy dálizden aspai otyr, iaǵni moratoriidi buzý faktileri tirkelmegen.
Bir jyldaǵy baǵa ózgerisi
2025 jyldyń qańtarynda memlekettik retteý toqtatylǵan kezde janarmai baǵasy aitarlyqtai tómen deńgeide bolatyn. Mysaly, sol kezde Astanada AI-92 benzini 202–205 teńge, al Almatyda shamamen 205 teńge turǵan.
2026 jyldyń basynda baǵa mynadai deńgeige jetti:
– Astana: AI-92 – 237 teńge, AI-95 – 309–315 teńge, AI-98 – 354–365 teńge, dizel – 327–330 teńge;
– Almaty: AI-92 – 239 teńge, AI-95 – 313–321 teńge, AI-98 – 350–375 teńge, dizel – 330–335 teńge.
Saraptamalyq esepteýlerge súiensek, sońǵy bir jylda janar-jaǵarmai baǵasy orta eseppen 15–20 paiyzǵa ósken. Eń kóp qymbattaǵany – AI-95 pen AI-98 benzini.
Tolyq bak qansha turady?
Baǵanyń ósýi avtokólik júrgizýshileriniń shyǵynyna da áser etti. Mysaly, kólemi 50 litrlik bakty toltyrý quny bir jyl ishinde edáýir artqan.
2025 jyly:
– AI-92 – shamamen 10–10,2 myń teńge,
– AI-95 – 13–13,6 myń teńge,
– AI-98 – shamamen 14,8 myń teńge.
2026 jyly:
– AI-92 – 11,8–11,9 myń teńge,
– AI-95 – 15,4–16 myń teńge,
– AI-98 – 17,5–18,7 myń teńge.
Iaǵni bir jyl ishinde AI-92-men tolyq bak toltyrý shamamen 1700 teńgege, AI-95 – shamamen 2200 teńgege, al AI-98 – 2500 teńgege jýyq qymbattaǵan.
Moratorii aiaqtalǵannan keiin ne bolady?
Energetika ministrliginiń túsindirýinshe, moratorii aiaqtalǵannan keiin AI-92 benzini men dizel otynynyń baǵasyn naryqtyq júiege kóshirý birtindep júzege asyrylady.
Sarapshy Aleksei Alekseevtiń pikirinshe, AI-92 benzininiń baǵasyn memleket tarapynan baqylaýda ustaý mańyzdy, óitkeni Qazaqstandaǵy avtokólikterdiń basym bóligi eski, ári dál osy benzindi paidalanady. Eger bul janarmaidyń baǵasy erkin ósse, tasymal shyǵyndary arqyly kóptegen taýar men qyzmettiń baǵasy qymbattap, jalpy ómir súrý quny artýy múmkin.
Soǵan qaramastan, sarapshy Qazaqstandaǵy janarmai baǵasy álemdegi eń tómen deńgeidiń biri ekenin atap ótedi. Sondyqtan memleket infliatsiiany tejeý úshin bul baǵyttaǵy saiasatty jalǵastyrýy yqtimal.
Jańa munai óńdeý zaýyty qajet
Alekseevtiń aitýynsha, baǵany tek shekteýmen emes, janarmai óndirisin arttyrý arqyly da retteý qajet. Onyń pikirinshe, elde jańa munai óńdeý zaýytyn salý – janarmaidyń ózindik qunyn tómendetýdiń tiimdi joly.
Aita keteiik, jýyrda Úkimettiń keńeitilgen otyrysynda Prezident Qasym-Jomart Toqaev Qazaqstanda tórtinshi munai óńdeý zaýytyn salý máselesin sheshýdi tapsyrǵan bolatyn.
AI-95 te áleýmettik mańyzy bar otynǵa ainalýy múmkin
Sarapshynyń taǵy bir usynysy – AI-95 benzinin de áleýmettik mańyzy bar otyn túrine jatqyzý. Sebebi qazirgi zamanǵy kólikterdiń kópshiligi dál osy markaly benzindi talap etedi.
Onyń aitýynsha, sapaly janarmai paidalaný avtokólikterden shyǵatyn ziiandy qaldyqtardy azaityp, qalalardaǵy aýa sapasyn jaqsartýǵa yqpal etedi. Sondyqtan aldaǵy jyldary AI-95-tiń mańyzy odan ári arta túsýi múmkin.
