Elimizde jylyna 10 million tonna munai óńdei alatyn tórtinshi zaýyttyń qurylysy josparlanyp otyr. Energetika ministrligi jobany júzege asyrý úshin birneshe óńirdi, sonyń ishinde Mańǵystaý oblysyn da qarastyryp jatyr. Bul týraly premer-ministr Oljas Bektenovtiń depýtattyq saýalǵa bergen jaýabynda aityldy, dep habarlaidy Dalanews.kz.
Jańa munai óńdeý zaýytynyń qurylysy 2025–2040 jyldarǵa arnalǵan munai óńdeý salasyn damytý tujyrymdamasy aiasynda júzege aspaq.
Qujatqa sáikes, joba birneshe kezeńmen iske asyrylady:
- 2028–2030 jyldary – tehnikalyq-ekonomikalyq negizdeme (pre-FEED) ázirlenedi;
- 2030–2032 jyldary – jobalyq-smetalyq qujattar daiyndalady;
- 2032–2040 jyldary – zaýyttyń qurylysy júrgiziledi.
Bolashaq kásiporyn kómirsýtek shikizatyn tereń óńdeýge jáne TS-1/Jet A-1 sanatyndaǵy aviatsiialyq otyn óndirýge baǵyttalmaq.
Búginde Qazaqstanda úsh iri munai óńdeý zaýyty jumys isteidi. Olar Atyraý, Pavlodar jáne Shymkent qalalarynda ornalasqan. Bul zaýyttardy jańǵyrtýdan keiin aviaotyn óndirisi jylyna 300 myń tonnadan 633 myń tonnaǵa deiin artqan. Al 2025 jylǵa qarai bul kórsetkish 744 myń tonnaǵa jetedi dep boljanyp otyr.
