Qazaqstanda 2026 jyldyń birinshi toqsanynda halyqtyń negizgi azyq-túlik ónimderin tutyný kólemi ótken jyldyń sáikes kezeńimen salystyrǵanda ósti, dep habarlaidy dalanews.kz.
Ulttyq statistika biýrosynyń málimetinshe, bir turǵyn toqsanyna orta eseppen 20,7 keli et jáne et ónimderin tutynǵan. Byltyr bul kórsetkish 20,6 keli bolǵan. Sondai-aq sút jáne sút ónimderin tutyný 57,2 litrden 58,1 litrge, jumyrtqa 52 danadan 54 danaǵa, kókónis 18,3 keliden 18,7 kelige, kartop 11,3 keliden 11,4 kelige, al balyq pen teńiz ónimderi 3,5 keliden 3,6 kelige deiin ósken.
Sonymen qatar keibir azyq-túlik túrlerin tutyný azaiǵan. Atap aitqanda, jarma jáne dándi daqyldar ónimderi 31 keliden 30,6 kelige, jemis-jidek pen jańǵaq 17,5 keliden 17,4 kelige, al qant, tosap jáne bal 10,8 keliden 10,3 kelige deiin tómendegen. Mai men tońmaidy tutyný deńgeii ózgerissiz qalǵan.
Birinshi toqsanda qazaqstandyqtar jan basyna shaqqanda orta eseppen 11,4 keli kartop, 6 keli birinshi surypty unnan pisirilgen bidai nany, 6 keli siyr eti, 4,8 keli alma, 4,6 keli qant, 4,2 keli kúrish, 3,1 litr airan, 2,6 keli makaron, 2,4 litr sút, 2,1 keli jańa nemese salqyndatylǵan balyq, 54 jumyrtqa jáne 0,3 keli qara shai tutynǵan.
Kókónisti eń kóp tutynǵan óńir – Almaty qalasy, munda bir turǵynǵa shaqqanda kórsetkish 23,2 kelini qurady. Odan keiin Jetisý oblysy (22,8 keli) jáne Túrkistan oblysy (21,4 keli) ornalasqan. Al eń tómengi kórsetkish Shyǵys Qazaqstan oblysynda (16,5 keli), sondai-aq Abai jáne Almaty oblystarynda tirkelgen – árqaisysynda 16 keliden.
Et pen et ónimderin tutyný boiynsha Shyǵys Qazaqstan, Jetisý, Aqmola jáne Qaraǵandy oblystary kósh bastap tur. Eń tómengi kórsetkish Túrkistan oblysynda baiqalǵan.
Ulttyq statistika biýrosy bul derekter elimizdegi 12 myń úi sharýashylyǵyna júrgizilgen iriktemeli zertteý nátijesinde alynǵanyn málimdedi.
