Qazaqstan Premer-Ministri Oljas Bektenov elimizde qolaily epidemiologiialyq jaǵdaidy qamtamasyz etý jáne balalardyń densaýlyǵyn qorǵaý úshin vaktsinalar men meditsinalyq buiymdardyń qosymsha kólemin satyp alýǵa qarajat bólý týraly qaýlyǵa qol qoidy, dep habarlaidy Dalanews.kz.
"Ulttyq egý kúntizbesi sheńberinde ýaqytynda ekpe salynbai qalǵan 18 jasqa deiingi balalardy immýndaýǵa Úkimet rezervinen 5 832 377 600 (bes milliard segiz júz otyz eki million úsh júz jetpis jeti myń alty júz) teńge bólinedi.
Densaýlyq saqtaý ministrligi júrgizgen taldaý nátijesinde Qazaqstanda ekpe almaǵan 800 myńnan astam bala anyqtaldy. Kókjótel, difteriia, A jáne V virýsty gepatitteri, qyzylsha, qyzamyq, sirespe, poliomielit, parotit jáne gemofildi infektsiia siiaqty qaýipti juqpaly aýrýlarǵa qarsy tolyqtyra immýndaý júrgiziledi", - delingen habarlamada.
Qarajat oblystardyń, respýblikalyq mańyzy bar qalalardyń jáne astananyń ákimdikterine 747 720 doza vaktsina men 542 592 birlik shprits satyp alýǵa beriletin aǵymdaǵy nysanaly transfertter túrinde aýdarylady. Al Shyǵys Qazaqstan oblysynda balalardy qolda bar preparattar kólemi esebinen tolyqtyra vaktsinalaý josparlanyp otyr.
Densaýlyq saqtaý ministrliginiń málimetinshe, Qazaqstanda qyzylsha boiynsha epidemiologiialyq jaǵdai turaqtanyp keledi. Sońǵy 2 aida syrqattanýshylyq deńgeii 32%-ǵa tómendedi. Qosymsha jappai immýndaý aiasynda shamamen 1,3 mln adam ekpe aldy, bul vaktsina alýǵa jatatyn halyqtyń 91%-yn quraidy.
Sonymen qatar basqa da vaktsinamen basqarylatyn infektsiialarmen syrqattanýshylyq jaǵdailarynyń artqany baiqalady. Máselen, 2023 jyly kókjótel boiynsha keri dinamika tirkeldi, bul rette naýqastardyń 91%-y – ekpe almaǵan balalar. Sondai-aq qyzamyq, epidemiialyq parotit jáne A virýsty gepatitinde de ósim tirkeldi.
Halyq arasynda qaýipti infektsiialarmen syrqattanýshylyqtyń ósýine jol bermeý úshin Úkimet basshysy Oljas Bektenov Densaýlyq saqtaý ministrligi men ákimdikterge immýndaýdy ýaqytyly júrgizý máselesin jáne árbir óńirdegi epidemiologiialyq jaǵdaidy erekshe baqylaýǵa alýdy tapsyrdy.
