Qazaqstanda derbes derekterdiń iri bazalarymen jumys isteý kezinde bıometrıalyq aýtentıfıkasıany qoldaný mindetti bolady. Bul týraly Sıfrlyq damý jáne jasandy ıntellekt vıse-mınıstri Dosjan Musalıev málimdedi, dep habarlaıdy Dalanews.kz.
Onyń aıtýynsha, endi 100 myńnan astam jazbasy bar, qoljetimdiligi shekteýli derbes derekter saqtalǵan bazalarmen jumys barysynda kópfaktorly aýtentıfıkasıa, sonyń ishinde bıometrıalyq sáıkestendirý mindetti túrde engiziledi.
“Bul shara paıdalanýshylardy naqty sáıkestendirýge, sondaı-aq bógde adamdardyń derbes derekterge zańsyz qol jetkizý táýekelin azaıtýǵa baǵyttalǵan. Atap aıtqanda, ózgeniń logıni men qupıasózi arqyly júıege kirýdiń aldyn alýǵa múmkindik beredi”, – dep túsindirdi vıse-mınıstr.
Vedomstvonyń málimetinshe, 2025 jylǵy 22 jeltoqsanda derbes derekterdi qorǵaý sharalaryn júzege asyrý qaǵıdalary jańartyldy. Engizilgen ózgerister qoljetimdiligi shekteýli aqparatqa qol jetkizýdi qatań baqylaýdy kúsheıtip, memlekettik jáne ózge de sıfrlyq júıelerge ruqsatsyz kirý qaýpin tómendetýge baǵyttalǵan.
Qoljetimdiligi shekteýli derbes derekter qataryna Qazaqstan zańnamasyna sáıkes qoljetimdiligi shektelgen málimetter jatady. Olardyń ishinde jeke jáne otbasylyq aqparat, salyqtyq jáne banktik derekter, komersıalyq qupıa, medısına qyzmetkeriniń qupıasy, sondaı-aq kez kelgen qupıa sıpattaǵy jeke málimetter bar.
Sonymen qatar “elektrondyq úkimet” obektileri men aqparattyq-kommýnıkasıalyq ınfraqurylymnyń asa mańyzdy nysandaryn synaqtan ótkizý ádistemeleri men qaǵıdalaryna da ózgerister engizildi. Endi aqparattyq júıelerdiń synaq hattamalary úsh jyl merzimge jaramdy bolady. Osy merzim aıaqtalýyna keminde úsh aı qalǵanda, nysan ıeleri qaıta tekserýden ótý úshin ótinim berýge mindetti.
Aqparattyq qaýipsizdik komıtetiniń habarlaýynsha, buǵan deıin aqparattyq júıelerdi tekserý merzimsiz júrgizilip kelgen. Endi naqty talap engizildi. Barlyq júıe úsh jyl saıyn kıberqaýipsizdik turǵysynan tekserilýi tıis.
“Bul derekterdiń qorǵalý deńgeıin júıeli túrde baǵalaýǵa jáne osal tustardy der kezinde anyqtaýǵa múmkindik beredi”, – dep atap ótti komıtet ókilderi.
Vedomstvoda qabyldanǵan ózgerister azamattardyń derbes derekterin qorǵaýǵa, aqparattyq qaýipsizdikti kúsheıtýge jáne derekter kólemi men kıberqaýipterdiń artýy jaǵdaıynda sıfrlyq servısterdiń turaqty jumysyn qamtamasyz etýge baǵyttalǵan memleket júrgizip otyrǵan júıeli jumystyń bir bóligi ekenin atap ótti.
