Qazaqstanda dári-dármek ainalymyn tsifrlandyrý zańsyz saýda men kontrafaktilik ónimderdi anyqtaý múmkindigin keńeitti. 2025 jyly tsifrlyq tańbalaý júiesiniń kómegimen zańsyz ainalymda júrgen 21 myńnan astam dárilik ónim tirkelgen, dep habarlaidy dalanews.kz.
Tsifrlyq sheshimder dári-dármekterge degen suranysty naqty eseptep qana qoimai, olardyń óndirýshiden patsientke deiingi qozǵalysyn baqylaýǵa múmkindik beredi. Qazir preparattarǵa qajettilik burynǵydai ortaq normativter boiynsha emes, ár patsienttiń naqty suranysy negizinde josparlanady. Jańa júiemen shamamen 2,1 mln adam men 692 meditsinalyq uiym qamtylǵan.
Úkimettiń habarlaýynsha, ár dárilik qaptamaǵa beriletin tańbalaý kody arqyly preparattyń qaldyǵy men qozǵalysy onlain rejimde baqylanady. Júie dáriniń qaidan kelip, qaida jóneltilgenin anyqtaýǵa, kúmándi operatsiialardy baiqaýǵa jáne zańsyz esepten shyǵarýdyń aldyn alýǵa kómektesedi.
"Tek 2025 jyldyń ózinde tańbalaý júiesi arqyly zańsyz saýdadaǵy 21 myńnan astam dárilik ónim anyqtaldy. Sonymen qatar dárilik zattardy retsept boiynsha tsifrlyq túrde usynýdy qamtamasyz etetin “Áleýmettik ámiian” servisi damyp keledi. Ótken jyly atalǵan servis arqyly 13,8 millionnan astam tsifrlyq retsept berildi", - delingen Úkimet habarlamasynda.
Farmatsevtikalyq naryqtaǵy tirkeý jáne baǵalardy bekitý rásimderi de elektrondy formatqa kóshirilgen. 2025 jyldyń qyrkúieginen bastap dárilik zattar men meditsinalyq buiymdar «bir tereze» qaǵidaty boiynsha tirkeledi. 2026 jylǵy 4 tamyzdaǵy málimetke sáikes, dárilerdi jedel saraptaý aiasynda 63 kelisim jasalyp, 20 ótinim qabyldanǵan.
Jańa qyzmet preparattar men meditsinalyq buiymdardy tirkeýge ketetin ýaqytty aitarlyqtai qysqartqan. Buǵan deiin bul rásim eki jylǵa deiin sozylsa, qazir standartty tirkeý merzimi 100 jumys kúnine deiin azaityldy. Al jedeldetilgen tártippen preparatty 15 jumys kúninde tirkeýge bolady.
Buǵan qosa AQSh, Ulybritaniia, Eýropalyq Odaq elderi, Shveitsariia, Kanada, Japoniia, Avstraliia, Ońtústik Koreia, Saýd Arabiiasy jáne Singapýrdyń retteýshi organdary maquldaǵan dárilerdi Qazaqstanda jeńildetilgen tártippen tirkeý múmkindigi qarastyrylǵan. Iaǵni preparat osy elderdiń birinde tiisti tekserýden ótken bolsa, Qazaqstanda ony qaitadan tolyq baǵalaý talap etilmeýi múmkin.
Osylaisha, tsifrlyq júie dárige qajettilikti esepteý, onyń qozǵalysyn qadaǵalaý, tirkeý jáne patsientke berý kezeńderiniń barlyǵyn qamtidy. Bul farmatsevtikalyq naryqtyń ashyqtyǵyn arttyryp, dári-dármektiń zańsyz ainalymyna baqylaýdy kúsheitýge múmkindik beredi.
