Qazaqstanǵa ákelinetin kofe kólemi keiingi jyldardaǵy eń joǵary kórsetkishke jetti. 2026 jyldyń qańtar-maýsym ailarynda elge 3,2 myń tonnaǵa jýyq ónim jetkizilgen. Bul byltyrǵy alǵashqy jartyjyldyqpen salystyrǵanda 38 paiyz artyq, dep habarlaidy dalanews.kz.
Ulttyq statistika biýrosynyń dereginshe, import quny da edáýir ósken. Alty aida shetelden satyp alynǵan kofege 27,2 mln dollar jumsaldy. Byltyr osy kezeńde jumsalǵan qarajat kólemi budan 30 paiyzǵa az bolǵan. Sóitip, kofe importynyń kólemi men quny keminde 2015 jyldan bergi alǵashqy jartyjyldyqtar arasynda rekord jańartty.
Qazaqstanǵa negizinen qýyrylmaǵan arabika dánderi jetkiziledi. Bul ónim elge ákelingen kofeniń shamamen 40 paiyzyn quraidy. Degenmen arabika importy bir jyl ishinde aitarlyqtai ózgermegen.
Negizgi ósim basqa sanattaǵy kofe ónimderi esebinen qalyptasqan. Atap aitqanda, kofeini bar qýyrylǵan kofeniń importy 260 tonnadan 864 tonnaǵa deiin kóbeigen. Kedendik deklaratsiialardaǵy málimetterge qaraǵanda, bul sanatqa untaqtalǵan jáne eritin kofe, sondai-aq kofe kapsýlalary kiredi.
Keiingi birneshe jylda Qazaqstanǵa kofe jetkizý qarqyny údei túsken.
Qazaqstan importtalǵan kofeniń bir bóligin qaitadan shetelge satady. Alaida biyl eksport kólemi tómendep, jalpy importtyń 5 paiyzyna ǵana teń bolǵan. Sondyqtan syrtqa shyǵarylǵan ónimdi eseptemegende, eldiń ishki naryǵynda qalǵan kofe kólemi de rekordtyq deńgeige jetti.
