Qazaqstan Respýblikasy Eńbek jáne halyqty áleýmettik qorǵaý ministrligi Employment Permit System (EPS) júiesi arqyly Qazaqstan azamattaryn Koreia Respýblikasynda jumysqa ornalastyrý úshin irikteý tártibin túsindirdi, dep habarlaidy dalanews.kz.
Praktikalyq irikteý Almaty qalasynda EPS ortalyǵy ashylǵannan keiin bastalady. Osy ortalyqta kandidattardyń korei tilin qanshalyqty biletini EPS-TOPIK testi arqyly anyqtalady. Sonymen qatar olardyń kásibi bilimi men daǵdylary baǵalanady. Koreia Respýblikasyna attanar aldynda jumysshylar úshin mindetti daiyndyq ta uiymdastyrylady. Irikteý barysynda azamattyń bilimi, eńbek ótili jáne bar kásibi sertifikattary eskeriledi.
Koreiaǵa jumysqa barýǵa 18-den 39 jasqa deiingi jastar qatysa alady. Bul rette azamattyń sottalmaǵan bolýy, Koreia Respýblikasynan buryn kúshtep shyǵarylmaǵany jáne elge kirýge tyiym salynbaǵany eskeriledi. Sondai-aq Qazaqstannan shetelge shyǵýyna eshqandai shekteý bolmaýy qajet. Kandidattar belgilengen talaptarǵa sai baldyq júie arqyly baǵalanady.
Qajetti talaptarǵa sai kelip, barlyq kezeńnen sátti ótken azamattar resmi jumys izdeýshiler tizimine engiziledi. Bul úshin jaramdy tólqujattyń bolýy jáne meditsinalyq tekserýden ótýi mindetti.
Jeke maǵlumatta bilimi, kásibi tájiribesi, sertifikattary, testileý nátijeleri jáne qandai jumysqa ornalasqysy keletini týraly málimetter kórsetiledi. Osy aqparattyń negizinde koreilik jumys berýshiler belgilengen irikteý kezeńderinen ótken azamattardyń arasynan ózderine qajetti qyzmetkerdi tańdai alady.
Bul rette mańyzdy nársege nazar aýdarý qajet: emtihannan ótý jáne resmi kandidattar tizimine engizilý azamattyń Koreiada avtomatty túrde jumysqa ornalasatynyn bildirmeidi. Kandidattardy túpkilikti tańdaý quqyǵy koreilik jumys berýshige tiesili. Iaǵni jumys berýshi tirkelgen kandidattardyń arasynan ózine qajetti qyzmetkerdi ózi tańdaidy.
EPS júiesi boiynsha Koreia Respýblikasyna jumysqa qabyldanatyn Qazaqstan azamattarynyń sany jyl saiyn Koreia tarapy aiqyndaityn kvotaǵa sáikes belgilenedi.
Jumys berýshi kandidatty tańdaǵan soń eńbek shartyn usynady. Qol qoiýǵa deiin qyzmetkerge qandai jumysty atqaratyny, jumys ýaqyty, eńbek jaǵdailary jáne basqa da mańyzdy talaptar túsindiriledi. Eki tarap qol qoiǵannan keiin eńbek shartynyń túpnusqasy qyzmetkerge beriledi.
Koreiaǵa jumysqa baratyn azamat úshin aldyn ala daiyndyq kezeńi qarastyrylǵan. Ol Almaty qalasyndaǵy EPS ortalyǵynda ótkiziledi. Daiyndyq aiaqtalyp, jumys vizasy rásimdelgennen keiin azamat Koreiadaǵy jumys ornyna attanady.
EPS júiesi boiynsha jumys isteý merzimi úsh jylǵa deiin bolýy múmkin. Zańnamada kózdelgen jaǵdailarda bul merzimdi taǵy bir jyl on aiǵa deiin uzartýǵa bolady. Belgilengen jumys merzimin tolyq aiaqtap, Qazaqstanǵa óz erkimen qaityp kelgen jumysshylarǵa Koreia Respýblikasyna keiin qaita barý úshin neǵurlym qolaily jaǵdailar qarastyrylǵan.
Eńbek ministrligi Koreiada jumys isteýdi josparlap otyrǵan azamattarǵa tek memlekettik organdar men ýákiletti uiymdardyń resmi aqparatyn paidalanýdy eskertedi. Azamattar «jumysqa mindetti túrde ornalastyramyz», «irikteýden jedel ótkizemiz» nemese «belgilengen tártipten tys kandidattar tizimine engizemiz» dep ýáde beretin jeke deldaldarǵa qujattaryn nemese aqshasyn bermeýi qajet.
Birde-bir jeke deldal azamatqa Koreiada jumysqa ornalasýǵa kepildik bere almaidy. Sebebi kandidattardy túpkilikti tańdaýdy koreilik jumys berýshi júzege asyrady.
Tirkeýdiń naqty qashan bastalatyny, qujattardy tapsyrý tártibi, EPS-TOPIK testin ótkizý merzimi men tártibi, sondai-aq irikteýdiń basqa da kezeńderi týraly aqparat Qazaqstan Respýblikasy Eńbek jáne halyqty áleýmettik qorǵaý ministrliginiń resmi resýrstarynda qosymsha jariialanady.
