Qazaqstanda baýyr obyryn erte anyqtaýǵa arnalǵan jańa joba qolǵa alyndy

Qazaqstanda baýyr obyryn erte anyqtaýǵa arnalǵan jańa joba qolǵa alyndy

Qazaqstanda baýyr obyryn erte anyqtaý jáne diagnostikalaý sapasyn arttyrýǵa baǵyttalǵan joba iske qosyldy. Bastama aiasynda elimizdiń tórt qalasyndaǵy meditsinalyq uiymdar zamanaýi ýltradybystyq apparattarmen jabdyqtalyp, 200-den astam mamanǵa arnaiy oqytý júrgizildi, dep habarlaidy dalanews.kz.

Joba Pavlodar, Almaty, Astana jáne Óskemen qalalaryn qamtidy. Meditsinalyq jabdyqtar baýyr tininiń jaǵdaiyn baǵalaýǵa, ondaǵy kúdikti ózgeristerdi anyqtaýǵa jáne zertteý nátijelerin halyqaralyq LI-RADS hattamasy boiynsha standarttaýǵa múmkindik beredi.

Mamandardyń aitýynsha, baýyr obyryn emdeýdegi negizgi máselelerdiń biri – aýrýdyń kóbine kesh satysynda anyqtalýy. Bastapqy kezeńderde aiqyn belgiler baiqalmaýy múmkin. Sonyń saldarynan naýqastardyń bir bóligi dárigerge isik asqynǵan kezde ǵana júginedi.

S. D. Asfendiiarov atyndaǵy Qazaq ulttyq meditsina ýniversitetiniń gastroenterologiia kafedrasynyń meńgerýshisi, Baýyrdy zertteý jónindegi qazaqstandyq qaýymdastyqtyń tóraǵasy, professor Aleksandr Nersesovtiń aitýynsha, Qazaqstanda gepatotselliýliarlyq kartsinoma (GTsK) onkologiialyq aýrýlar arasynda taralý kórsetkishi boiynsha toǵyzynshy orynda tur. Alaida bul derek aýrýdyń ózektiligin tómendetpeidi.

Maman baýyr fibrozy bar patsientterdi turaqty baqylaýdyń mańyzyn atap ótti. Onyń pikirinshe, mundai naýqastarda qaterli isiktiń damý qaýpin eskerip, júieli tekserý júrgizý qajet. Bul aýrýdy erte kezeńde anyqtaý múmkindigin arttyrady.

Jobanyń pilottyq kezeńi Almatyda 2026 jylǵy maýsym-qazan ailary aralyǵynda júrgizilgen. «Syzǵanov atyndaǵy Ulttyq ǵylymi hirýrgiia ortalyǵy» AQ sáýlelik diagnostika dárigeri Aigúl Oljabaevanyń málimetinshe, osy kezeńde tekserilgen 100 patsienttiń 25-inde baýyr tinindegi kúdikti ózgerister baiqalǵan. Odan keiin patsientter qosymsha tekserýge jiberilip, keibirinde gepatotselliýliarlyq kartsinoma diagnozy rastalǵan.

Mamandardyń aitýynsha, jańa diagnostikalyq múmkindikter kúdikti ózgeristerdi erterek anyqtap, naýqastardy qosymsha zertteýge ýaqytyly jiberýge kómektesedi. Al bul emdeý taktikasyn der kezinde tańdaýǵa yqpal etýi múmkin.

Joba AstraZeneca kompaniiasynyń General Electric-pen yntymaqtastyǵy aiasynda júzege asyrylyp jatyr. Bastamanyń negizgi baǵyty – meditsinalyq uiymdardy qajetti tehnologiialarmen qamtamasyz etý, diagnostikalyq zertteýlerdiń biryńǵai standarttaryn engizý jáne dárigerlerdiń kásibi biliktiligin arttyrý.

Mamandar baýyr aýrýlary bar adamdar úshin turaqty meditsinalyq baqylaýdyń mańyzyn eske salady. Ásirese baýyr fibrozy men basqa da sozylmaly baýyr aýrýlary bar patsientter dáriger usynǵan tekserý kestesin saqtaýy qajet.