Quryltai depýtaty Erlan Saiyrov ulttyq amandasý dástúrin balalardyń tárbiesine júieli túrde engizýdi usyndy, dep habarlaidy dalanews.kz.
Depýtattyń pikirinshe, sálemdesý mánin balaǵa erte jastan túsindirip, durys amandasý daǵdysyn qalyptastyrý qajet.
"Sálemdesý – ulttyq bolmysymyzdy aiqyndaityn mańyzdy qundylyqtardyń biri. Ony jas urpaqtyń sanasyna erte jastan sińirýimiz kerek", – dedi depýtat.
Depýtattyq saýalynda ol Memleket basshysy Qasym-Jomart Toqaevtyń ulttyq murany saqtaý men damytýǵa, sondai-aq amandasý mádenietine qatysty aitqan pikirlerine toqtaldy.
Erlan Saiyrov sálemdesý ádebin qalyptastyrýǵa arnalǵan biryńǵai talaptar men ádistemelik quraldar ázirleýdi usyndy. Sonymen qatar ulttyq amandasý dástúrin elimizdegi barlyq mekteptiń tárbie jumysyna turaqty túrde engizý qajet ekenin aitty.
"Mektepterde sálemdesý mádenietin qalyptastyrýǵa baǵyttalǵan biryńǵai ádistemelik quraldar ázirlenýge tiis. Bul másele synyp saǵattarynda kóterilip, ata-analarmen birlesken jumys arqyly nasihattalýy qajet. Muǵalimder de oqýshylarǵa jeke úlgi kórsetýi kerek", – dedi Erlan Saiyrov.
