Qazaqstanda balalardy zańsyz jáne ziiandy aqparattan qorǵaý aiasynda 6863 internet-resýrsqa qoljetimdilik shekteldi, dep habarlaidy dalanews.kz.
Bul týraly Úkimet otyrysynda Mádeniet jáne aqparat ministriniń birinshi orynbasary Qanat Ysqaqov málimdedi.
Onyń aitýynsha, ministrlik jazǵy kezeńde balalardyń qaýipsizdigin kúsheitý úshin múddeli memlekettik organdarmen birlesip 59 tarmaqtan turatyn arnaiy mediajospar ázirlegen.
Jospar aiasynda 30 beinerolik daiyndalyp, olar respýblikalyq telearnalar efirinde 50 retten astam kórsetilgen. Keiin rolikter qoǵamdyq oryndarda taratý úshin óńirlerge jiberilgen.
Sonymen qatar jazǵy maýsymda qazaqstandyq telearnalarda balalarǵa arnalǵan 9 jańa joba iske qosylady. Olar tsifrlyq jáne qarjylyq saýattylyqty damytýǵa, ulttyq mádeniet pen sportty nasihattaýǵa baǵyttalǵan.
Ministrlik málimetinshe, jazǵy naýqan aiasynda:
– murajailar men teatrlarda 1,5 myńnan astam mádeni-aǵartý is-sharasy ótedi;
– Býrabai aýdanynda alǵashqy respýblikalyq shyǵarmashylyq lager ashylady;
– «Jasyl el» jasaqtaryna 34 myńnan astam jas ýaqytsha jumysqa ornalastyrylady.
Budan bólek, internet keńistigin baqylaý jumystary kúsheitilgen.
«Balalardy quqyqqa qarsy aqparattan qorǵaý maqsatynda zańsyz aqparat ornalastyrylǵan 6 863 internet-resýrsqa shekteý qoiyldy. Sondai-aq áleýmettik jeli ákimshilikterine 869 pablikti buǵattaý úshin 20 myńnan astam material joldandy», – dedi Qanat Ysqaqov.
Osylaisha, bilik balalarǵa arnalǵan qaýipti kontentti shekteýmen qatar, jazǵy demalys kezinde aqparattyq qaýipsizdik pen paidaly kontent kólemin arttyrýdy kózdep otyr.
