Qazaqstanda «Qazaqstan balalary» tujyrymdamasy aiasynda balalardyń psihologiialyq qaýipsizdigin kúsheitetin jańa tsifrlyq júie qurylady, dep habarlaidy Dala News.
2026–2030 jyldarǵa arnalǵan baǵdarlama sheńberinde elde psihologiialyq diagnostika men súiemeldeýdiń biryńǵai tsifrlyq platformasy iske qosylady. Jańa júie balanyń minez-qulqyndaǵy jáne psihoemotsiialyq kúiindegi táýekelderdi erte kezeńde anyqtaýǵa, ózgeristerdi turaqty baqylaýǵa jáne naqty kómekke muqtaj balalardy úzdiksiz qoldaýǵa múmkindik beredi.
Platforma arqyly ár balaǵa arnalǵan jeke kómek baǵyty qalyptasady. Bul vedomstvolar arasyndaǵy qaitalanatyn fýnktsiialardy azaityp, mamandardyń júktemesin tómendetýge, eń bastysy, balanyń máselesin der kezinde baiqaýǵa jaǵdai jasaidy.
Tujyrymdama aiasynda pedagog-psihologtardyń róli de kúsheitiledi. Atap aitqanda:
•bilim berý uiymdarynda balalardyń áleýmettik jáne emotsiialyq daǵdylaryn damytýǵa arnalǵan psiholog saǵaty engiziledi
•zorlyq-zombylyqtan zardap shekken balalarǵa arnalǵan kómek kabinetteri ashylady
•pedagog-psihologtarǵa arnalǵan biryńǵai kásibi standarttar qaita qaralady
•mamandardyń biliktiligin mindetti túrde arttyrý kózdeledi
•keis-menedjment júiesi engizilip, psiholog balany jáne otbasyn keshendi súiemeldeýdiń negizgi býynyna ainalady
•psihologtar vedomstvoaralyq áreketke mindetti túrde qatysady, sonyń ishinde qylmystyq protsester kezinde zardap shekken balalardy súiemeldeý de qarastyrylǵan
Bul qadamdar bir rettik áreketten júieli profilaktikaǵa kóshýge, pedagog-psihologtardyń mártebesin arttyrýǵa jáne árbir balaǵa qai óńirde tursa da ýaqtyly ári kásibi psihologiialyq kómek kórsetýge múmkindik beredi.
