Qazaqstanda 2025 jyly ótetin ulttyq aýyl sharýashylyǵy sanaǵyna daiyndyq qalai júrgizilip jatqany jóninde Ulttyq statistika biýrosynyń basshysy Maqsat Turlybaev Ortalyq kommýnikatsiialar qyzmetinde ótken brifingte keńinen málimdedi.
Aýyl sharýashylyǵy sanaǵyna – halyqaralyq standartpen
Maqsat Turlybaevtyń aitýynsha, aýqymdy sanaqqa 1,5 jyl buryn daiyndyq bastalyp ketken. Úkimet deńgeiinde arnaiy komissiia qurylǵan, barlyq quqyqtyq-normativtik qujattar bekitilgen, sondai-aq aýyl sharýashylyǵy sanaǵy salasyndaǵy aldyńǵy qatarly tájiribeler zerttelip, Latviia, AQSh, Polsha, Resei, Ózbekstan, Ulybritaniia, Grýziia jáne BUU Azyq-túlik jáne aýyl sharýashylyǵy uiymy (FAO) ókilderimen keńester ótken.
– FAO-nyń halyqaralyq usynymdaryna sáikes, aýyl sharýashylyǵy sanaǵy ár 5–10 jyl saiyn ótýi tiis. Alaida Qazaqstanda bul sanaq sońǵy ret 2006–2007 jyldary, eki kezeń boiynsha (ósimdik sharýashylyǵy men mal sharýashylyǵy jeke-jeke) júrgizildi. Bul aralyqta úlken úzilis oryn aldy, – dedi Biýro basshysy.
Sanaq kimderdi qamtidy?
2025 jyly ótetin aýyl sharýashylyǵy sanaǵy bir kezeńde, 1 tamyz ben 20 qazan aralyǵynda uiymdastyrylady jáne ol eki formatta – onlain jáne oflain túrde ótedi.
Sanaqqa qatysatyndar:
- aýyl sharýashylyǵymen ainalysatyn zańdy tulǵalar;
- jeke kásipkerler, sonyń ishinde sharýa jáne fermer qojalyqtary;
- jeke qosalqy sharýashylyq ieleri – mal ustaityn nemese jeri bar azamattar.
Basty maqsat – eldegi aýyl sharýashylyǵy resýrstarynyń naqty kartasyn jasaý, ónim óndirisiniń qurylymy men kólemin anyqtaý jáne jergilikti sheshimderge negiz bolarlyq statistikalyq baza qurý.
Sanaq qalai ótedi?
1 – 30 maýsym, 2025 jyl:
Aldyn ala tizimdeý (listing) kezeńi ótedi. Bul kezde sanaq júrgizýshiler 70 qala men aýdan aýmaǵynda jeke sharýashylyqtardy aralap, olardy naqtylap, negizgi sanaqqa qatysatyn úi sharýashylyqtarynyń tizimin jasaidy.
– Bul jumys arqyly tizimdegi mekenjaida shyn máninde turǵyndardyń bar-joǵyn jáne olardyń qosalqy sharýashylyq júrgizip otyrǵanyn anyqtaimyz, – dedi Maqsat Turlybaev.
1 – 31 tamyz, 2025 jyl:
Onlain-sanaq bastalady. Jeke jáne zańdy tulǵalar sanaq.gov.kz portalynda tirkelip, sanaq paraqtaryn qashyqtan toltyra alady. Qazirgi ýaqytta portal testilik rejimde qoljetimdi.
20 qyrkúiek – 20 qazan, 2025 jyl:
Oflain sanaq kezeńi ótedi. Onlain formatty qoldanbaǵan nemese jartylai ǵana toltyrǵan respondentterge arnaiy interviýerler planshetpen kelip, betpe-bet saýalnama júrgizedi. Bul ádis derekterdiń dáldigi men jyldamdyǵyn qamtamasyz etedi.
2 million úi, 300 myń óndirýshi: tolyq qamtý
Ulttyq statistika biýrosynyń málimetinshe, 2025 jylǵy sanaq shamamen 2 million úi sharýashylyǵyn jáne 300 myń aýyl sharýashylyǵy óndirýshisin qamtidy.
Zańǵa sáikes, sanaqqa qatysýdan bas tartqandar ákimshilik jaýapkershilikke tartylady. Bul – málimetterdiń tolyqtyǵy men naqtylyǵyn qamtamasyz etý úshin qajet shara.
Derekterdiń qupiialyǵy – basty nazarda
Maqsat Turlybaev respondentterdiń málimetteri qatań qupiiada saqtalatynyn basa aitty. Jinalǵan aqparat tek statistikalyq maqsatta agregattalǵan túrde óńdeledi. Eshbir jeke derek salyq organdaryna nemese basqa memlekettik mekemelerge berilmeidi.
– Sanaq nátijesinde alynǵan málimetter azamattardyń aty-jónimen emes, jalpylanǵan kórsetkishter retinde jariialanady. Bul halyqtyń senimin arttyryp, shynaiy derek qoryn qalyptastyrýǵa jol ashady, – dedi ol.
Nátijeler qashan jariialanady?
2025 jylǵy jeltoqsanda – aldyn ala qorytyndylar jariialanady;
2026 jyly – tolyq statistikalyq esepter men analitikalyq sholýlar Ulttyq statistika biýrosynyń resmi saitynda ashyq túrde jariialanady.
Sarapshylar ne deidi?
Ekonomika ǵylymdarynyń kandidaty, agrarlyq salanyń sarapshysy Saiat Jumabekov:
– Bul sanaq – aýyl sharýashylyǵyna qatysty naqty sheshim qabyldaýdyń negizi. Óndiris kólemi, jeke qojalyqtardyń qurylymy, mal men eginniń esebi, barlyq baǵyttaǵy derekter júielenip, ár oblys pen aýdan boiynsha aýyl saiasatynyń jańǵyrýyna yqpal etedi.
2025 jylǵy aýyl sharýashylyǵy sanaǵy – bul jai ǵana statistikalyq naýqan emes, eldiń azyq-túlik qaýipsizdigin qamtamasyz etetin mańyzdy derekterdiń bastaýy. Jaýapty qatysý – ár azamattyń aýyl men memlekettiń bolashaǵyna qosqan úlesi.
