14 naýryz Amal merekesi kúni balalar úiine, kópbalaly jáne erekshe balasy bar otbasylarǵa ulttyq dám men taǵamdarǵa toly «Tartý», eńbek adamdary men ziialylarǵa «Sybaǵa» atty Naýryz qorjyny tartý etildi.
«Uly dala dámi» ulttyq jobasy Naýryz merekesine jańa mazmun berip, ulttyq qundylyqtardy jańǵyrtýǵa baǵyttalǵan. Ulystyń uly kúnin jańasha atap ótýge qatysty Memleket basshysy Qasym-Jomart Toqaev ta únemi aityp keledi.
Joba bastamashysy – «Alatau Aqparat» mediaholdingi. Onyń Bas direktory Erjan Qalymbaiuly: «Negizgi maqsatymyz – Áz-Naýryzdy ásirese, balalar asyǵa kútetin basty merekege ainaldyrý. Ulystyń uly kúnin airyqsha atap ótýde jańa qundylyqtar men dástúr qalyptastyrýǵa óz úlesimizdi qosqymyz keledi», – deidi.
Almaty oblystyq №1 balalar úiine ulttyq kiimdegi qolynda asa taiaǵy bar Qydyr ata nemeresimen birge atpen bardy. Ol balalarǵa Naýryz batasyn berip, «Tartý» qorjyndaryn úlestirdi. Balalar da óz ónerlerin kórsetti. Uiymdastyrýshylar Qydyr Atanyń nemeresin – Baq-bala (Baq qarasyn, Qydyr darysyn) dep ataýdy jón kórgen.
Etnograf Bolat Bopaiulynyń sózinshe, Naýryzdy jańasha dáripteýde balalarǵa erekshe kóńil bólinýi kerek. Qydyr atanyń nemeresimen júrýi urpaqtar sabaqtastyǵy men ulttyq tárbieniń mánin kórsetedi. Qazaq uǵymynda atasy ul nemerelerin, al ájeler qyz nemerelerin tárbielegen. Sondyqtan Qydyr Ata men Baq-balany Naýryzdyń balalar asyǵa kútetin basty keiipkerlerine ainaldyrý kerek.
Ulttyq naqyshta bezendirilip kiiz úi pishininde tigilgen balalarǵa arnalǵan «Tartý» qorjyndarynyń ishine Qazaqstannyń ár óńirinen jetkizilgen (batys, shyǵys, ońtústik, soltústik) dámder salynǵan. Olardyń sany jeteý (kieli san): shubat, qymyz, qurt, irimshik, jent, baýyrsaq, talqan, sondai-aq rýhani azyq – kitap pen Almatynyń almasy, Altaidyń baly, ulttyq kádesyilar men oiynshyqtar bar. Kitaptardyń syilyq quramynda bolýy – jastardy bilim-ǵylymǵa shaqyrady.
Qorjyndardaǵy tabiǵi ári túrli dárýmenderge bai ulttyq taǵamdar balalardy salaýatty tamaqtanýǵa bastaidy. Sondai-aq, joba ulttyq taǵam túrleri men qolóner buiymdaryn nasihattap, sala kásipkerlerin qoldaýǵa jaqsy múmkindik.
Naýryzda jastar úlkenderge arnaiy baryp sálem berip, qurmet kórsetip batasyn alǵan. Ulttyq jobany uiymdastyrýshylar da Asanáli Áshimov, Asyly Osman, Tóregeldi Sharmanov pen Qarlyǵash Ábdikárimova syndy el aǵalaryna, qoǵam qairatkerlerine sondai-aq qarapaiym eńbek adamdaryna da sálem bere bardy. Olarǵa Naýryz qorjyny tartý etilip, qurmet kórsetilip, iyqtaryna shapan jabyldy.
Úlkenderge berilgen «Sybaǵa» qorjynyna jeti dámniń syrtynda jyly-jumsaq: súrlengen qazy-qarta, jal-jaia men jambas salynǵan.
Naýryz qorjyn berilgender arasynda qarapaiym kóshe sypyrýshy, «Altyn alqa» iegeri men erekshe balany jalǵyz tárbielep otyrǵan ana da bar.
Alǵash ret uiymdastyrylǵan ulttyq jobanyń basty demeýshileri: «Asiakoz» túrik kóz klinikasy, «Erke-Nur», «Ádemi-Ai» men «Adal As» syndy tanymal kompaniialar. Sondai-aq, elimizdiń barlyq óńirinen «Zhent_chocolate», «Aqtobe damderi», «Sharman», «Asatu», «Astana-Ónim» AQ, «Miod Vostochnyi», «Aiqan» JShS syndy ulttyq taǵamdar, kiimder men buiymdar shyǵaratyn kompaniialar, saýda markalary jáne «Steppe&World Publishing» baspa úii atsalysyp, demeýshilik tanytty. Qazaq taǵamtaný akademiiasy, Qazaq memlekettik Tsirki men ulttyq taǵamtanýshy Saiahat Ásimhan da jobaǵa óz úlesterin qosty.
Uiymdastyrýshylar «Uly dala dámi» ulttyq jobasyn aldaǵy jyldary 14 naýryzdan bastap aidyń sońyna deiin tutas respýblika kóleminde ótkizýdi josparlap otyr.
