14 ناۋرىز امال مەرەكەسى كۇنى بالالار ۇيىنە، كوپبالالى جانە ەرەكشە بالاسى بار وتباسىلارعا ۇلتتىق ءدام مەن تاعامدارعا تولى «تارتۋ»، ەڭبەك ادامدارى مەن زيالىلارعا «سىباعا» اتتى ناۋرىز قورجىنى تارتۋ ەتىلدى.
«ۇلى دالا ءدامى» ۇلتتىق جوباسى ناۋرىز مەرەكەسىنە جاڭا مازمۇن بەرىپ، ۇلتتىق قۇندىلىقتاردى جاڭعىرتۋعا باعىتتالعان. ۇلىستىڭ ۇلى كۇنىن جاڭاشا اتاپ وتۋگە قاتىستى مەملەكەت باسشىسى قاسىم-جومارت توقايەۆ تا ۇنەمى ايتىپ كەلەدى.
جوبا باستاماشىسى – «Alatau Aqparat» مەدياحولدينگى. ونىڭ باس ديرەكتورى ەرجان قالىمباي ۇلى: «نەگىزگى ماقساتىمىز – ءاز-ناۋرىزدى اسىرەسە، بالالار اسىعا كۇتەتىن باستى مەرەكەگە اينالدىرۋ. ۇلىستىڭ ۇلى كۇنىن ايرىقشا اتاپ وتۋدە جاڭا قۇندىلىقتار مەن ءداستۇر قالىپتاستىرۋعا ءوز ۇلەسىمىزدى قوسقىمىز كەلەدى»، – دەيدى.
الماتى وبلىستىق №1 بالالار ۇيىنە ۇلتتىق كيىمدەگى قولىندا اسا تاياعى بار قىدىر اتا نەمەرەسىمەن بىرگە اتپەن باردى. ول بالالارعا ناۋرىز باتاسىن بەرىپ، «تارتۋ» قورجىندارىن ۇلەستىردى. بالالار دا ءوز ونەرلەرىن كورسەتتى. ۇيىمداستىرۋشىلار قىدىر اتانىڭ نەمەرەسىن – باق-بالا (ب ا ق قاراسىن، قىدىر دارىسىن) دەپ اتاۋدى ءجون كورگەن.
ەتنوگراف بولات بوپاي ۇلىنىڭ سوزىنشە، ناۋرىزدى جاڭاشا دارىپتەۋدە بالالارعا ەرەكشە كوڭىل ءبولىنۋى كەرەك. قىدىر اتانىڭ نەمەرەسىمەن ءجۇرۋى ۇرپاقتار ساباقتاستىعى مەن ۇلتتىق تاربيەنىڭ ءمانىن كورسەتەدى. قازاق ۇعىمىندا اتاسى ۇل نەمەرەلەرىن، ال اجەلەر قىز نەمەرەلەرىن تاربيەلەگەن. سوندىقتان قىدىر اتا مەن باق-بالانى ناۋرىزدىڭ بالالار اسىعا كۇتەتىن باستى كەيىپكەرلەرىنە اينالدىرۋ كەرەك.
ۇلتتىق ناقىشتا بەزەندىرىلىپ كيىز ءۇي پىشىنىندە تىگىلگەن بالالارعا ارنالعان «تارتۋ» قورجىندارىنىڭ ىشىنە قازاقستاننىڭ ءار وڭىرىنەن جەتكىزىلگەن (باتىس، شىعىس، وڭتۇستىك، سولتۇستىك) دامدەر سالىنعان. ولاردىڭ سانى جەتەۋ (كيەلى سان): شۇبات، قىمىز، قۇرت، ىرىمشىك، جەنت، باۋىرساق، تالقان، سونداي-اق رۋحاني ازىق – كىتاپ پەن الماتىنىڭ الماسى، التايدىڭ بالى، ۇلتتىق كادەسىيلار مەن ويىنشىقتار بار. كىتاپتاردىڭ سىيلىق قۇرامىندا بولۋى – جاستاردى ءبىلىم-عىلىمعا شاقىرادى.
قورجىندارداعى تابيعي ءارى ءتۇرلى دارۋمەندەرگە باي ۇلتتىق تاعامدار بالالاردى سالاۋاتتى تاماقتانۋعا باستايدى. سونداي-اق، جوبا ۇلتتىق تاعام تۇرلەرى مەن قولونەر بۇيىمدارىن ناسيحاتتاپ، سالا كاسىپكەرلەرىن قولداۋعا جاقسى مۇمكىندىك.
ناۋرىزدا جاستار ۇلكەندەرگە ارنايى بارىپ سالەم بەرىپ، قۇرمەت كورسەتىپ باتاسىن العان. ۇلتتىق جوبانى ۇيىمداستىرۋشىلار دا ءاسانالى ءاشىموۆ، اسىلى وسمان، تورەگەلدى شارمانوۆ پەن قارلىعاش ابدىكارىموۆا سىندى ەل اعالارىنا، قوعام قايراتكەرلەرىنە سونداي-اق قاراپايىم ەڭبەك ادامدارىنا دا سالەم بەرە باردى. ولارعا ناۋرىز قورجىنى تارتۋ ەتىلىپ، قۇرمەت كورسەتىلىپ، يىقتارىنا شاپان جابىلدى.
ۇلكەندەرگە بەرىلگەن «سىباعا» قورجىنىنا جەتى ءدامنىڭ سىرتىندا جىلى-جۇمساق: سۇرلەنگەن قازى-قارتا، جال-جايا مەن جامباس سالىنعان.
ناۋرىز قورجىن بەرىلگەندەر اراسىندا قاراپايىم كوشە سىپىرۋشى، «التىن القا» يەگەرى مەن ەرەكشە بالانى جالعىز تاربيەلەپ وتىرعان انا دا بار.
العاش رەت ۇيىمداستىرىلعان ۇلتتىق جوبانىڭ باستى دەمەۋشىلەرى: «Asiakoz» تۇرىك كوز كلينيكاسى، «ەركە-نۇر»، «ادەمى-اي» مەن «ادال اس» سىندى تانىمال كومپانيالار. سونداي-اق، ەلىمىزدىڭ بارلىق وڭىرىنەن «Zhent_chocolate»، «Aqtobe damderi»، «Sharman»، «Asatu»، «ءاستانا-ونىم» اق، «ءمود ۆوستوچنىي»، «ايقان» ج ش س سىندى ۇلتتىق تاعامدار، كيىمدەر مەن بۇيىمدار شىعاراتىن كومپانيالار، ساۋدا ماركالارى جانە «Steppe&World Publishing» باسپا ءۇيى اتسالىسىپ، دەمەۋشىلىك تانىتتى. قازاق تاعامتانۋ اكادەمياسى، قازاق مەملەكەتتىك سيركى مەن ۇلتتىق تاعامتانۋشى ساياحات ءاسىمحان دا جوباعا ءوز ۇلەستەرىن قوستى.
ۇيىمداستىرۋشىلار «ۇلى دالا ءدامى» ۇلتتىق جوباسىن الداعى جىلدارى 14 ناۋرىزدان باستاپ ايدىڭ سوڭىنا دەيىن تۇتاس رەسپۋبليكا كولەمىندە وتكىزۋدى جوسپارلاپ وتىر.
