Oqý-aǵartý ministrligi oqýshylarǵa qatysty alaiaqtyqtyń jańa tásili paida bolǵanyn málimdedi, dep habarlaidy Dalanews.kz.
Ministrlik málimetinshe, jańa oqý jyly bastalǵaly beri alaiaqtar balalarǵa qońyraý shalyp, ózin muǵalimmin dep tanystyryp jatyr.
"Elektron kúndelikti jańartý" degen syltaýmen olar SMS arqyly kelgen bir rettik qupiia kodty suraidy. Bala ony ata-anasyna nemese mektebine kómektesip jatyrmyn dep oilaýy múmkin. Is júzinde alaiaqtar osy kodty paidalanyp, "Elektron úkimet" júiesine, onlain bankingke nemese týystarynyń bank shottaryna qol jetkizedi", - dep jazylǵan habarlamada.
Balamen áńgimeleskende erekshe mán beretin jaittar:
- qandai jaǵdaida da SMS arqyly kelgen kodty eshkimge bermeý;
- qońyraý shalǵan adam ózin muǵalim nemese mektep qyzmetkerimin dese de, birden ata-anasyna habarlasý;
- kúdikti siltemelerge ótpeý, beitanys qosymshalardy júktemeý.
"Kúdikti áreketter baiqalǵan jaǵdaida quqyq qorǵaý organdaryna nemese 111 bailanys ortalyǵyna habarlasýǵa bolady", - dep jazylǵan habarlamada.
