Prezident Qasym-Jomart Toqaev Adam quqyqtary jónindegi ýákil Artýr Lastaevty qabyldady, dep habarlaidy Dalanews.kz.
Aqorda habarlaǵandai, Artýr Lastaev Qasym-Jomart Toqaevqa aýmaqtyq ókilderdiń tolyqtai iske kiriskeni jaiynda málimet berdi. Onyń aitýynsha, byltyr Ombýdsmenniń atyna 5 myńnan astam ótinish túsken. Bul 2022 jylǵy kórsetkishpen salystyrǵanda 1,5 ese kóp.
Sonymen qatar Memleket basshysyna Ulttyq preventivti mehanizmniń jumysy, zańnamany jetildirý, halyqaralyq yntymaqtastyqty, quqyq qorǵaý uiymdarymen jáne azamattyq qoǵammen ózara yqpaldastyqty jandandyrý máseleleri týraly baiandaldy. Atap aitqanda, azaptaýlardyń aldyn alý úshin oqshaýlaý mekemelerinde myńnan astam kezdesý ótkizilgen, azamattardyń quqyqtaryn qalpyna keltirý boiynsha 3,5 myńnan asa usynym berilgen, 275 laýazymdy tulǵa jaýapkershilikke tartylǵan. Nátijesinde 900-den astam adamnyń quqyǵy qorǵaldy.
Budan bólek, Adam quqyqtary jónindegi ýákil Prezidenttiń turmystyq zorlyq-zombylyqtyń aldyn alý jónindegi tapsyrmasyn oryndaý maqsatynda qabyldanǵan sharalar týraly aitty. Quqyq qorǵaý institýty turmystyq zorlyq-zombylyqqa qarsy is-qimyl týraly arnaiy baiandama ázirlep jatyr.
Qasym-Jomart Toqaev adam quqyǵyn qorǵaýǵa kepildik berý isin odan ári kúsheitý qajet ekenine nazar aýdardy.
