Qazaqstanda 11 áýejaiǵa qatysty tergeý bastaldy, dep habarlaidy Dalanews.kz.
Básekelestikti qorǵaý jáne damytý agenttiginiń málimetinshe, birqatar áýejailarda investitsiialyq jobalardy aiaqtaý úshin, investitsiialyq jobalar aiaqtalǵanǵa deiin aviakerosin ótkizý qyzmetin jalǵastyrý múmkindigi qarastyrylǵan. Bul rette qarajattyń maqsatty paidalanylýyna baqylaý júzege asyrylatyn bolady.
Sondai-aq áýejai infraqurylymyn damytý boiynsha júieli sharalar bastaý alýda, oǵan áýejailardyń keibir qyzmetteri tarifterin ishinara retteý jáne ulǵaitý arqyly olardyń shyǵynsyz jumysyn qamtamasyz etý, importtyq aviakerosindi ákelýge qoiylǵan shekteýlerdi alyp tastaý jáne ózge de sharalar kiredi.
Sonymen qatar Agenttik aviakerosinge monopoliialyq joǵary baǵa belgileý boiynsha 11 áýejaiǵa qatysty tergep-tekserý bastady: «Nursultan Nazarbaev halyqaralyq áýejaiy» AQ, «Qorqyt Ata áýejaiy» AQ, «Sary-Arqa áýejaiy» AQ, «Shymkent áýejaiy» AQ, «Áýlie-Ata halyqaralyq áýejaiy» AQ, «Qostanai halyqaralyq áýejaiy» AQ, «Óskemen halyqaralyq áýejaiy» AQ, «Túrkistan halyqaralyq áýejaiy» AQ, «Oral halyqaralyq áýejaiy» AQ, «Semei halyqaralyq áýejaiy» JShS, «Jezqazǵan-Eir» áýe kompaniiasy» AQ. Sonymen qatar aviakerosindi qaitalama kóterme ótkizý naryǵyndaǵy jetkizýshilerge qatysty da tekserýler júrgizilýde.
Búgingi kúni Agenttik 2023 jyly munaidy qaita óńdeý qyzmetterine monopoliialyq joǵary baǵa belgileý jáne ustap turý túrindegi ústem jaǵdaidy teris paidalanǵany úshin «AMÓZ» JShS-ne qatysty tergep-tekserýdi aiaqtady. Onyń materialdary quqyq qorǵaý organdaryna joldandy.
