Sanaýly kúnderden keiin Astanada Qazaqstan halqy Assambleiasy Keńesiniń otyrysy ótedi. Biyl bul qurylymnyń qurylǵanyna 30 jyl. Tarihi mereitoi qarsańynda biz elimizdiń basty erekshelikteri men Assambleianyń qazirgi qoǵamdaǵy orny týraly sarapshylar pikirin tyńdadyq, - dep habarlaidy Dalanews.kz
— Qazaqstan — postkeńestik elder arasynda erekshe memleket. Sebebi biz — kópetnosty elmiz. Mundai qoǵamda turaqtylyq pen beibitshilik saqtaý ońai emes, — deidi «Uiǵyr Avozi» gazetiniń bas redaktory Ershat Asmatov. — Memleket basshysy men úkimetke úlken jaýapkershilik júkteledi. Tek ekonomikalyq nemese áleýmettik máseleler ǵana emes, ulttyq, etnostyq tepe-teńdik te únemi nazarda bolýy kerek. Bul jerde eń bastysy — eldiń birligi men yntymaǵy.
Assambleia — ultaralyq tatýlyqtyń qazaqstandyq tájiribesi
Ershat Asmatov atap ótkendei, Qazaqstanda biregei qurylym — Qazaqstan halqy Assambleiasy jumys isteidi. Bul institýt álemdik tájiribede sirek kezdesedi. Assambleia arqyly elde ár ulttyń mádenieti, tili, tarihy saqtalyp, damýyna jaǵdai jasalǵan. Onyń ústine, Qazaqstan Konstitýtsiiasynda árbir etnostyń quqyǵy zań júzinde bekitilgen.
— Qazaqstan halqy Assambleiasynyń qurylýy, onyń tóraǵasy retinde Prezidenttiń sailanýy — kezdeisoqtyq emes. Bul — oilastyrylǵan sheshim. Buǵan kóptegen elder qyzyǵýshylyqpen qarap, tájiribeni úlgi etedi.
Ulttar dostyǵy — syn saǵatta kórinedi
Sońǵy jyldary elde oryn alǵan tabiǵi apattar men tótenshe jaǵdailar kezinde Assambleia jáne onyń músheleri belsendilik tanytyp keledi.
— Mysaly, 2010 jyly Qyzylaǵashty sý basqanda, Uiǵyr mádeni ortalyǵy 14 myń dollar kóleminde kómek kórsetti. Basqa da tótenshe jaǵdailarda — Maqtaraldaǵy sý tasqyny, batystaǵy apattar, órt kezinde — túrli etnos ókilderi, volonterler, metsenattar birlese otyryp, qol ushyn berdi. Bul — naǵyz dostyq pen janashyrlyqtyń belgisi, — deidi Asmatov.
Assambleianyń evoliýtsiiasy jáne jańa format
Ótken jyldary Májiliste Assambleiadan toǵyz depýtat sailanyp, etnostardyń múddesin qorǵady. Qazir bul júie ózgerip, Senatta bes oryn Qazaqstan halqy Assambleiasyna berilgen. Bul — ulttyq saiasattaǵy oń qadamnyń biri.
— Meniń oiymsha, kez kelgen ekonomikalyq ne áleýmettik máseleni sheshýden buryn eldegi birlik pen tatýlyqty, ulttyq saiasatty durys jolǵa qoiǵan abzal. Kópetnostylyq — bul bólinýshilik emes, kerisinshe, baýyrmaldyqtyń, túsinistiktiń, adamgershiliktiń simvoly. Alla adamdardy túrli ult etip jaratqan, olar bir-birin úirenip, qurmetteýi úshin, — deidi bas redaktor.
30 jyldyq tájiribe — álemge úlgi
Qazaqstan halqy Assambleiasy — ótken otyz jylda ultaralyq tatýlyq pen turaqtylyqtyń berik modelin qalyptastyrdy. Bul modeldiń ózegi — eldegi barlyq etnostardyń teń quqyǵy men ulttyq birlikke negizdelgen qoǵamdyq kelisim.
