Ujymdyq bitimgershilik kúshteriniń áskeri qyzmetshilerin elderine shyǵaryp salý rásimi bir minýttyq únsizdikpen bastaldy. Keńes Odaǵynyń Batyry, Halyq Qaharmany, armiia generaly Saǵadat Nurmaǵambetov atyndaǵy Qurlyq áskerleri Áskeri institýtynyń saptyq alańynda ótken bitimgershilik kontingentterdi shyǵaryp salý rásimine UQShU-nyń Bas hatshysy Stanislav Zas, Qazaqstan Respýblikasy Qorǵanys ministriniń orynbasary general-maior Muhamedjan Talasov, Almaty qalasynyń ákimi Baqytjan Saǵyntaev qatysty.
UQShU Ujymdyq bitimgershilik kúshteri tobynyń qolbasshysy general-polkovnik Anatolii Serdiýkov barlyq jeke quramǵa batyl sheshimderi men áskeri boryshyn minsiz oryndaǵandary úshin alǵys aitty.
Sonymen qatar qolbasshy Qazaqstan Qorǵanys ministrliginiń basshylyǵyna kópultty bitimgershilik kontingentiniń turmys-tirshiligin qamtamasyz etý máselelerin sheshýge kómekteskeni úshin rizashylyǵyn bildirdi.
Qazaqstan Respýblikasy Qorǵanys ministriniń orynbasary general-maior Muhamedjan Talasov Qarýly Kúshterdiń Joǵarǵy Bas qolbasshysy – el Prezidenti Qasym-Jomart Kemeluly Toqaev uiymǵa múshe memleketterdiń basshylaryna eldegi jaǵdaidy turaqtandyrýǵa járdemdesý úshin Birikken bitimgershilik kontingentin engizý týraly ótinish jasaǵanyn atap ótti.
"Sizder strategiialyq jáne basqa da mańyzy bar nysandardy kúzetýdi qamtamasyz ettińizider. Bitimgershilik kontingent kelip qazaqstandyq áskeri qyzmetshiler, ishki ister qyzmetkerleri sodyrlardy izdestirý jáne ustaý boiynsha ózderiniń tikelei mindetterine kirise aldy", – dedi Muhamedjan Talasov.
Qazaqstan Qorǵanys ministriniń atynan Ujymdyq bitimgershilik kúshteri kontingentiniń áskeri qyzmetshilerine alǵys bildirildi. Birqatar bitimgerler QR Qorǵanys ministriniń buiryǵymen "Halyqaralyq yntymaqtastyqqa qosqan úlesi úshin" medaldarymen jáne gramotalarmen marapattaldy.
Ujymdyq Qaýipsizdik Keńesiniń sheshimine sáikes UQShU Ujymdyq bitimgershilik kúshteri Qazaqstan Respýblikasynda memlekettik, áskeri jáne áleýmettik mańyzy bar nysandardy kúzetý jónindegi mindetterdi oryndady.
Dostyq jáne áskeri yntymaqtastyq qaǵidattaryn basshylyqqa ala otyryp, konstitýtsiialyq tártipti qalpyna keltirý boiynsha baýyrlastyq kómek retinde Armeniia Respýblikasy, Belarýs Respýblikasy, Qyrǵyzstan Respýblikasy, Resei Federatsiiasy men Tájikstan Respýblikasy el aýmaǵyna 2 030 adam men 250 birlik áskeri tehnikasyn jiberdi.
UQShU bitimgershilik kúshterin bizdiń elden kezeń-kezeńimen shyǵarý 13 qańtardan bastap Qazaqstan Prezidenti belgilegen merzimderge sáikes júzege asyrylatyn bolady.
Olardyń jalpy sany – 2030 sarbaz. UQShU kúshteri eki qalada – Almaty men Nur-Sultanda ornalastyryldy.
