Sońǵy úsh jylda Qazaqstanǵa keletin sheteldik týrister sany jyl saiyn orta eseppen 8–12%-ǵa ósip otyr. Alaida bul ósim turaqty úrdiske ainalmai, kóbine jekelegen oqiǵalar men iri sharalarǵa táýeldi bolyp qalýda, dep habarlaidy Dala News.
Qazaq Expert Club sarapshysy, týrizm salasynyń mamany Merýert Omardyń aitýynsha, sheteldik qonaqtardy kóbine halyqaralyq kontsertter, sporttyq matchtar, kórmeler men mádeni is-sharalar tartady. Mysaly, 2025 jyly «Qairat» fýtbol klýbynyń tórt oiyny Almatyǵa 4 myńnan astam sheteldik jankúier ákelip, qala ekonomikasyna shamamen 3 mlrd teńge kiris túsirgen. Al «Qairat» pen «Real Madrid» arasyndaǵy match kezinde úsh kúnniń ishinde ǵana 5 221 týrist tirkelgen.
Bul kezeńde eń kóp kelgender Qytaidan, Reseiden, Úndistannan, Ońtústik Koreiadan jáne Ózbekstannan bolǵan. Resmi derekter boiynsha, olar qala ekonomikasyna shamamen 7,8 mln dollar ákelgen. Bul tek qonaqúilerde turǵandar esebinen alynǵan kórsetkish. Páter jaldaǵan nemese týystarynyń úiinde toqtaǵandar bul statistikaǵa kirmeidi.
Sarapshynyń aitýynsha, Almaty áli de negizgi týristik hab bolyp otyr. 2025 jyly qala 1,8 mln-nan astam týrist qabyldaǵan. Alaida Túrkistan, Shymkent, Aqtaý, Mańǵystaý óńiri, Býrabai men Qonaev siiaqty baǵyttar da áleýetke ie. Bul óńirler qysqa merzimdi 2–3 kúndik saiahattarǵa qolaily ári infraqurylymy birtindep damyp keledi.
Búginde bir sheteldik týrist Qazaqstanda orta eseppen 1 400 dollar shamasynda qarjy jumsaidy. Soǵan qaramastan, týrizmniń el ekonomikasyndaǵy úlesi nebári 3,2% deńgeiinde qalyp otyr. Bul álemdik ortasha kórsetkishten tómen. Mamandar bul úlesti 5-6%-ǵa deiin jetkizýge tolyq múmkindik bar dep esepteidi.
Ol úshin oqiǵalyq týrizmmen qatar, óńirlik baǵyttardy júieli damytý qajet. Qonaevta halyqaralyq áýejai ashý, Aqtaý, Túrkistan jáne Shymkentke tikelei halyqaralyq reisterdi kóbeitý, daiyn týristik marshrýttardy usyný, aǵylshyn tilindegi navigatsiiany damytý turaqty ósimge jol ashatyn negizgi qadamdar.
Sarapshynyń pikirinshe, osy ózgerister jasalmaiynsha, Qazaqstan týrizmi maýsymdyq sipattan aryla almaidy ári turaqty serpinge qol jetkize almaidy.
