Qazaqstan siyr etiniń eksportyn 34,4%-ǵa arttyrdy

Qazaqstan siyr etiniń eksportyn 34,4%-ǵa arttyrdy
JI: Dalanews.kz

2026 jyly Qazaqstannan shetelge shyǵarylǵan siyr etiniń kólemi 34,4%-ǵa ósip, 43 myń tonnaǵa jetti. Al qoi etiniń eksporty 30 myń tonnany qurady. Bul týraly aýyl sharýashylyǵy ministri Aidarbek Saparov málimdedi, dep habarlaidy dalanews.kz.

Ministrdiń aitýynsha, Memleket basshysynyń tapsyrmasymen 2026-2030 jyldarǵa arnalǵan mal sharýashylyǵyn damytý jónindegi keshendi jospar ázirlengen. Qujatta et pen sút óndirisin ulǵaitý, mal ónimdiligin arttyrý baǵyttary qamtylǵan.

Atap aitqanda, ettiń barlyq túrin óndirý kólemin qazirgi 1,2 mln tonnadan 1,8 mln tonnaǵa deiin arttyrý josparlanyp otyr. Sondai-aq aýyl sharýashylyǵy qurylymdaryndaǵy sút óndirisin 1,4 mln tonnadan 2,1 mln tonnaǵa jetkizý kózdelgen.

«Ónimdilik boiynsha naqty mejelerimiz bar. Qazir ár 100 siyrdan 64 buzaý alynady. Bul kórsetkishti keminde 80-ge jetkizý qajet. Iri qara maldyń táýliktik ortasha salmaq qosýyn 600-800 gramnan 1,5-1,8 kelige deiin arttyrýdy josparlap otyrmyz. Al zamanaýi sút fermalarynda bir siyrdan jylyna alynatyn sút kólemin 10 myń litrge jetkizý kózdelgen», – dedi Aidarbek Saparov.

Sonymen qatar Soltústik Qazaqstan oblysynyń tájiribesin taratý baǵdarlamasy aiasynda 2023 jyldan beri 102 taýarly sút fermasynyń jobasy qarjylandyrylǵan. Onyń 71-i búginde paidalanýǵa berildi.

Eske salaiyq, 2026 jyldyń toǵyz aiynda Qazaqstanda mal sharýashylyǵynyń jalpy ónimi 3 trln 226 mlrd teńgeden asty. Naqty kólem indeksi 103,5%-dy qurady. Osy kezeńde elde ettiń barlyq túrinen 846,5 myń tonna ónim óndirildi. Bul ótken jyldyń sáikes kezeńimen salystyrǵanda 3,7%-ǵa kóp.

Al 2026 jyldyń qańtar-maýsym ailarynda úi sharýashylyqtary 4,2 myń tonna siyr etin satqan. Bul byltyrǵy jyldyń osy kezeńindegi 6,3 myń tonna kórsetkishten 32,9%-ǵa tómen.

Osy aralyqta shoshqa etiniń satylymy 27,3%-ǵa qysqaryp, 2,7 myń tonnany qurady. Qus etin satý kólemi de 51%-ǵa azaiyp, 47,4 tonnaǵa deiin tómendedi. Al jylqy eti men qoi etiniń satylymynda ósim baiqaldy. Jylqy etiniń satylymy 12,1%-ǵa artyp, 1,5 myń tonnaǵa jetse, qoi eti 7%-ǵa ósip, 780,5 tonnany qurady.