QR Ǵylym jáne joǵary bilim ministri Saiasat Nurbek elimizge júzdegen qazaqstandyq ǵalym shetelden oralatynyn málimdedi, dep habarlaidy Dalanews.kz.
Ministr 1990 jyldary KSRO ydyraǵannan keiin elden bilikti ǵalymdardyń boi tasalap ketkenin atap ótti. Osy tusta ol qazirgi tańda ǵylym salasynyń mamandaryn atamekenine qaitarý jumystary júrip jatqanyn jetkizdi.
Máselen, 1990 jyldary Qazaqstanda 52 myń ǵylymi qyzmetker bolsa, 2000 jylǵa qarai bul san 12 myń adamǵa deiin azaiǵan eken.
"Elshiliktermen birlese otyryp, biz derekter bazasyn jasadyq. Jetekshi ǵylymi institýttarda nemese ýniversitetterde jumys isteitin 680 jas ári tájiribeli ǵalymdar bar — biz olardy anyqtadyq", - dedi ministr.
Osyǵan bailanysty ǵylym jáne joǵary bilim ministri olardy elge qaitarý úshin úsh baǵyt boiynsha jumys júrgizilip jatqanyn alǵa tartty. Birinshi másele – bul qazaqstandyq ǵalymdardyń elge oralǵysy kelmeýi. Sondyqtan "Bolashaq" tálimgerlik baǵdarlamasy boiynsha jas kadrlar olardan bilim alýǵa jiberiledi.
"Máselen, Murat Saparbaev Parijde úlken zerthanany basqarady. Onyń jetekshiligimen Ál-Farabi jáne Sátbaev atyndaǵy ýniversitetterden alty ǵalym jumys isteidi. Ol ǵalymdardy oqytady jáne Qazaqstanda osyndai zerthana qurýǵa kómektesedi", — dedi Saiasat Nurbek.
Sondai-aq qazaqstandyq ǵalymdardyń "tikelei oralý" nusqasy da bar. Dos Sarbasov Qazaqstanǵa osylai keldi. Ministrdiń aitýynsha, oǵan QR Prezidenti janyndaǵy Ǵylym jáne tehnologiialar jónindegi ulttyq keńestiń múshesi jáne Nazarbaev ýniversitetiniń zerthanasy mártebesi berilgen. Ǵalymdardy elge qaitarýdyń úshinshi joly – elden ketken ǵalymdardyń Qazaqstandaǵy áriptesterine dáris oqýy. Joba "Tsifrlyq kóshpendiler lektsiiasy" seriiasy dep atalady. Sonymen qatar emigrant ǵalymdar ǵylymi keńesterge táýelsiz direktor bolýǵa shaqyrylýy múmkin.
