Qazaqstan shekarasynda janar-jaǵarmai materialdarynyń (JJM) elden zańsyz shyǵarylýyna jol bermeý maqsatynda 59 politsiia beketi ornatyldy, dep habarlaidy dalanews.kz.
Ishki ister ministrliginiń málimetinshe, jyl basynan beri janarmaidy el aýmaǵynan zańsyz alyp shyǵýǵa qatysty 255 árekettiń joly kesilgen.
Vedomstvonyń habarlaýynsha, zań buzýshylar kólikterin arnaiy qaita jabdyqtap, qosymsha janarmai baktaryn ornatqan. Osylaisha olar shekara arqyly múmkindiginshe kóp kólemde otyndy alyp ótpek bolǵan.
Atalǵan zań buzýshylyqtar úshin 195 shetel azamaty men 60 Qazaqstan azamaty ákimshilik jaýapkershilikke tartyldy.
Sonymen qatar, IIM politsiia beketteri Qazaqstannyń qai eldermen shekarasynda ornalasqany jáne mundai quqyq buzýshylyqtar qai kezeńde jii tirkelgeni týraly naqty aqparat bergen joq.
