Ulttyq qaýipsizdik komitetiniń Shekara qyzmeti shilde aiynyń alǵashqy 21 kúninde memlekettik shekara arqyly janar-jaǵarmai materialdaryn zańsyz áketýdiń 1342 áreketiniń jolyn kesti, dep habarlaidy dalanews.kz.
UQK málimetinshe, 1-21 shilde aralyǵynda ótkizý beketterinde jalpy kólemi 112 tonnadan asatyn janar-jaǵarmai materialdaryn zańsyz tasymaldaý áreketteri tirkelgen.
Vedomstvonyń habarlaýynsha, zań buzǵan azamattar Qazaqstan Respýblikasynyń qoldanystaǵy zańnamasyna sáikes jaýapkershilikke tartylǵan.
UQK mundai sharalar eldiń energetikalyq qaýipsizdigin qamtamasyz etýge jáne janar-jaǵarmaidyń kóleńkeli ainalymyna jol bermeýge baǵyttalǵanyn atap ótti.
Qazirgi ýaqytta memlekettik shekara arqyly munai ónimderin zańsyz áketýdiń jolyn kesý jumystary jalǵasyp jatyr.
