Qazaqstan Respýblikasy Toǵyzqumalaq sporty federatsiiasynyń prezidenti bolyp Ákim Tursun sailandy. Al buǵan deiin respýblikalyq federatsiiany basqarǵan qoǵam qairatkeri Alihan Baimenov uiymnyń Qurmetti prezidenti bolyp bekitildi. Sonymen birge Alihan Baimenov Dúniejúzilik toǵyzqumalaq federatsiiasy prezidenti qyzmetin jalǵastyrady.
Astanada ótken respýblikalyq federatsiianyń jiynynda Alihan Baimenov osy kúnge deiin QR Toǵyzqumalaq sporty federatsiiasy vitse-prezidenti qyzmetin atqarǵan Ákim Tursundy federatsiia basshysy qyzmetine usyndy. Otyrysqa qatysqan óńirlik federatsiia jetekshileri, toǵyzqumalaq qairatkerleri jáne federatsiia basshylyq quramy usynysty qoldap, Tursundy QR Toǵyzqumalaq sporty federatsiiasy prezidenti laýazymyna sailady.
Aita ketý kerek, Alihan Baimenov respýblikalyq federatsiiany 2004-2025 jyldar aralyǵynda basqardy. Sondai-aq bul bas qosýda respýblikalyq federatsiianyń vitse-prezidentteri laýazymyna Batyrbek Qulekeev, Sholpan Qadyrova, Maqsat Shotaev, Dáýlet Ábdikárimov sailandy. Maqsat Shotaev vitse-prezidenttik pen birge Dúniejúzilik toǵyzqumalaq federatsiiasynda bas hatshy qyzmetin atqarady. Federatsiianyń qurmetti prezidenti, prezident, vitse-prezident jáne bas hatshy qyzmetteri - qoǵamdyq negizdegi jumys. Al QR Toǵyzqumalaq sporty federatsiiasy PR direktory laýazymyna jýrnalist Rishat Asqarbekuly taǵaiyndaldy.
Otyrys barysynda Dúniejúzilik toǵyzqumalaq federatsiiasynyń prezidenti Alihan Baimenov jinalǵandarǵa 2024 jyly atqarylǵan jumystar men sharalardyń esebi boiynsha aqparat berdi. Ótken jyl ulttyq ziiatkerlik oiynnyń erekshe damý jyly bolǵanyn jáne 5-shi Dúniejúzilik kóshpendiler oiyny eldegi tarihi oqiǵalardyń biri ekenin atap ótti. Bul jyly dástúrli júzdegen sharamen qatar tyń jáne iri jańalyqtar molboldy.
Bul sharalar Dúniejúzilik jáne QR Toǵyzqumalaq sporty federatsiiasy men óńirlerdegi toǵyzqumalaq federatsiialarynyń, QR Týrizm jáne sport ministrliginiń, Oqý-aǵartý ministrliginiń, Sportty qoldaý qorynyń jáne jergilikti ákimdikterdiń, sport basqarmalarynyń tyǵyz áriptestigimen toǵyzqumalaq janashyrlary, demeýshi kásipkerlerdiń qoldaýy arqasynda júzege asyryldy.
