Qazaqstan Reseidiń kúrish sortynyń ornyna otandyq sortty synaqtan ótkize bastady, dep habarlaidy Dalanews.kz.
Qyzylorda oblysynda Y.Jaqaev atyndaǵy Qazaq kúrish sharýashylyǵy ǵylymi-zertteý institýty jańa kúrish sortyn synaqtan ótkizip jatyr. "Syr sulýy" dep atalatyn bul sort az ýaqytta pisip-jetiletindikten, sýdy da az qajet etedi. Synaq nátijeleri jańa kúrish sorty 105-110 kúnde pisip-jetilip, jergilikti aýa raiy men topyraqqa tolyq beiimdelgenin kórsetken.
Barlyq agrotehnikalyq talap oryndalǵan jaǵdaida gektarynan 80-85 tsentnerge deiin ónim alýǵa bolady. Qazirgi tańda Qyzylorda oblysynda negizinen reseilik kúrish sorttary ósiriledi. Olar tolyq pisip-jetilý úshin 120-125 kún ýaqyt alady.
"Qazaqstannyń ońtústik óńirlerindegi sý sharýashylyǵy jaǵdaiy sýdy únemdeýdiń jańa tásilderin izdeýdi jáne ázirleýdi qajet etip otyr. Álemdik klimattyń ózgerýin eskersek, osyndai jańa daqyl túrleri burynnan ósirilip júrgen sýdy kóp qajet etetin sorttarǵa jaqsy balama bola alady. Bul ǵylymi jumystyń nátijesi aýyl sharýashylyǵynyń damýyna jáne kúrish alqaptarynda sý tutynýdy azaitýǵa oń yqpal etedi", – dedi Y.Jaqaev atyndaǵy Qazaq kúrish sharýashylyǵy ǵylymi-zertteý institýty basqarma tóraǵasynyń ǵylymi jumystar jónindegi orynbasary Januzaq Baimanov.Sonymen qatar, ǵylymi-zertteý institýty Sý resýrstary jáne irrigatsiia ministrligimen birlesip, Water Retainer jańa preparatyn synaqtan ótkizip jatyr. Ol topyraqtaǵy ylǵaldy uzaq saqtaýǵa kómektesedi.
