Qazaqstan pasporty Henley Passport Index 2026 halyqaralyq reitinginde 66-orynǵa ie bolyp, Ortalyq Aziia elderi arasynda kósh bastady. Indeks deregine sáikes, qazaqstandyqtar aldyn ala viza rásimdemei, álemniń 77 baǵytyna bara alady, dep habarlaidy dalanews.kz.
Ótken jyly Qazaqstan bul reitingte 65-orynda bolǵan. Biyl jalpy tizimde bir saty tómendegenine qaramastan, el óńirdegi kóshbasshylyq ornyn saqtap qaldy. Henley Passport Index tólqujattardyń kúshin olardyń ieleri aldyn ala viza almai bara alatyn baǵyttardyń sany boiynsha baǵalaidy. 2026 jylǵy reitingte 199 eldiń pasporty men saiahattaýǵa bolatyn 227 baǵyt qamtylǵan.
Ortalyq Aziia elderi arasynda Qazaqstan eń joǵary kórsetkishke ie boldy. Odan keiin Qyrǵyzstan, Ózbekstan, Tájikstan jáne Túrikmenstan ornalasqan.
Indeks deregine sáikes, Qyrǵyzstan 59 baǵytqa vizasyz barý múmkindigimen 81-orynǵa, Ózbekstan 57 baǵytpen 82-orynǵa, al Tájikstan 52 baǵytpen 87-orynǵa jaiǵasqan. Túrikmenstan 44 baǵyt kórsetkishimen 93-orynǵa ie boldy.
Qazaqstan pasportynyń reitingi jyldar ishinde qalai ózgerdi?
Sońǵy 20 jylda Qazaqstan pasportynyń Henley Passport Index reitingindegi orny birneshe ret ózgergen. 2006 jyly Qazaqstan 68-orynda bolsa, 2008 jáne 2009 jyldary 65-satyǵa kóterilgen.
Qarastyrylyp otyrǵan kezeńdegi eń tómen kórsetkish 2015 jyly tirkeldi. Sol kezde Qazaqstan 76-orynǵa túsken. 2021 jyly el 75-satyda boldy, keiin reitingtegi ornyn birtindep jaqsarta bastady. 2022 jyly Qazaqstan 68-orynǵa, 2023 jyly 70-orynǵa turaqtady. 2024 jyly 66-satyǵa kóterilip, 2025 jyly 65-orynǵa jetti. Al 2026 jylǵy reitingte bir saty tómendep, 66-orynǵa ornalasty.
