Qazaqstandaǵy saiasi partiialardyń jarǵylary men baǵdarlamalaryn tekserý barysynda 230-dan astam qate anyqtaldy. Saraptama nátijesi resmi qujattardy ázirleý sapasyna qatysty suraq týyndatty, dep habarlaidy dalanews.kz.
Taldaýǵa «AMANAT» partiiasy, «Aq jol» Qazaqstan demokratiialyq partiiasy, Qazaqstan halyq partiiasy, «Aýyl» halyqtyq-demokratiialyq patriottyq partiiasy, Jalpyulttyq sotsial-demokratiialyq partiia, «Respublica» partiiasy jáne Qazaqstannyń jasyldar partiiasy «Baitaqtyń» jarǵylary men baǵdarlamalary engizilgen.
FBRK negizin qalaýshy Kirill Pavlov Qazaqstanda resmi tirkelgen jeti partiianyń qujattaryn Claude AI jasandy intellekt júiesi arqyly teksergen. Onyń aitýynsha, zertteýge prezidenttiń jasandy intellektpen jumysty kúsheitý jónindegi tapsyrmasy sebep bolǵan. Nátijesinde 14 qujattan 230-dan astam óreskel qate tabylǵan.
Eń kóp qate «Baitaq» partiiasynan anyqtalǵan – 49 qate. Saraptamaǵa sáikes, partiia baǵdarlamasynda «jasyl» sózi birneshe jerde qate jazylǵan. Tipti «Qazaqstannyń jasyl bolashaǵy úshin» degen ataýdyń ózinde orfografiialyq qate ketkeni aityldy. Sonymen qatar partiia jarǵysy «AMANAT» partiiasynyń qujatyna óte uqsas ekeni jáne ondaǵy qatelerdiń de qaitalanǵany kórsetilgen.
Qazaqstan halyq partiiasynyń qujattarynan 32 qate tabylǵan. Atap aitqanda, kei sózderdiń arasynda artyq bos oryndar ketkeni, sondai-aq maǵynany ózgertip jiberetin logikalyq sáikessizdikter anyqtalǵan.
«Respublica» partiiasynyń baǵdarlamasynda bógde mátinniń úzindisi kezdeisoq qalyp qoiǵany aityldy. Sonymen birge 2023 jylǵy redaktsiiadan keiin tarmaq nómirleýi buzylyp, orys jáne qazaq tilindegi nusqalar arasynda aiyrmashylyqtar tabylǵan.
Jalpyulttyq sotsial-demokratiialyq partiianyń baǵdarlamasy 2013 jyldan beri jańartylmaǵany belgili boldy. Al 2023 jyly qaita bekitilgen jarǵyda bir tarmaq tolyq qaitalanǵan. Sonymen birge partiia ataýyndaǵy «demokratiialyq» sózi bir jerde qate jazylǵan.
«Aýyl» partiiasynyń qujattarynda joq tarmaqtarǵa siltemeler men bólimderdegi nómirleý qateleri anyqtalǵan. Al jastarǵa qatysty negizgi tezisterde grammatikalyq sáikessizdikter kezdesken.
«Aq jol» partiiasynyń baǵdarlamasy tildik turǵydan eń saýatty qujattardyń biri dep baǵalanǵanymen, jarǵysynda quqyqtyq normalarǵa qatysty dálsizdikter tabylǵan.
Al «AMANAT» partiiasy eń az qate jibergen partiia retinde ataldy – 21 qate. Soǵan qaramastan partiia ataýy kei jerlerde kirill jáne latyn áripterin aralastyryp jazylǵany anyqtalǵan.
Kirill Pavlovtyń pikirinshe, kóptegen partiialarda uqsas qatelerdiń kezdesýi qujattardy daiyndaýda birdei shablondar qoldanylǵanyn kórsetýi múmkin.
