Qazaqstan qatarynan ekinshi jyl Ózbekstanǵa ósimdik maiyn jetkizetin eń iri eksporttaýshy mártebesin saqtap qaldy, dep habarlaidy dalanews.kz.
Sonymen qatar eldiń mai-tońmai ónimderi eksporty rekordtyq $944 mln-ǵa jetti.
2025 jyldyń qyrkúiegi men 2026 jyldyń mamyry aralyǵynda Qazaqstan Ózbekstanǵa 553 myń tonna mai-tońmai ónimin eksporttady. Bul ótken marketingtik jyldyń osy kezeńimen salystyrǵanda 130,8 myń tonnaǵa, nemese 31%-ǵa kóp.
2025 jyldyń qorytyndysy boiynsha Qazaqstannyń Ózbekstandaǵy ósimdik maiy naryǵyndaǵy úlesi 90%-dan asty. Sarapshylardyń málimetinshe, qazaqstandyq ónimdi jetkizý kólemi sońǵy bes marketingtik maýsym boiy turaqty ósip keledi.
Sonymen qatar mai-tońmai salasy ónimderiniń jalpy eksporty da artyp otyr. Marketingtik jyldyń toǵyz aiynda Qazaqstan ósimdik maiyn, shrot pen kúnjarany shetelge 944 mln AQSh dollaryna eksporttady.
Eksporttyq túsim 2024/2025 marketingtik jylynyń qyrkúiek–mamyr ailarymen salystyrǵanda 331 mln dollarǵa, nemese 54%-ǵa ulǵaidy.
Boljam boiynsha, aǵymdaǵy marketingtik jyldyń sońyna qarai ósimdik maiy, shrot jáne kúnjara eksportynyń kólemi 1,15 mlrd AQSh dollarynan asady.
Syrtqy naryqqa jetkizilimniń artýyna otandyq qaita óńdeý salasynyń damýy yqpal etip otyr. Qazirgi tańda Qazaqstandaǵy maily daqyldardy qaita óńdeý qýaty jylyna 5,2 mln tonnadan asady. Onyń ishinde 4,4 mln tonnasy kúnbaǵys tuqymyn óńdeýge arnalǵan.
Bul kórsetkish Ózbekstandaǵy barlyq qaita óńdeý qýatynan 700 myń tonnaǵa artyq.
Jańa kásiporyndardy salý jáne iske qosý esebinen 2028 jylǵa qarai Qazaqstannyń mai-tońmai salasyndaǵy qaita óńdeý qýatyn jylyna 8 mln tonnaǵa deiin jetkizý josparlanyp otyr.
Qazirgi ýaqytta qazaqstandyq mai-tońmai ónimderi 20-dan astam memleketke eksporttalady. Sonymen qatar Qazaqstan Ortalyq Aziia elderiniń kúnbaǵys shroty boiynsha qajettiligin tolyq qamtamasyz etip, kúnbaǵys maiyn eksporttaý kólemi jóninen álemde altynshy orynda tur.
Aldaǵy ýaqytta sala álemdegi kúnbaǵys maiyn eksporttaityn alǵashqy úsh eldiń qataryna enip, eksporttyq túsimdi 2 mlrd AQSh dollaryna deiin jetkizýdi maqsat etip otyr.
