Birikken mádenietterdiń X forýmy aiasynda QR Mádeniet jáne aqparat ministri Aida Balaeva men Resei Federatsiiasy Mádeniet ministri Olga Liýbimova kezdesti, dep habarlaidy Dalanews.kz.
Kezdesýdiń negizgi taqyryptarynyń biri – Uly Jeńistiń 80 jyldyǵyn merekeleýge daiyndyqqa qatysty kelisimderdi talqylaý boldy. Bul týraly Memleket basshysy úshinshi Ulttyq quryltaida atap ótken bolatyn. Prezident daiyndyqty bastaýǵa tapsyrma berip, el qorǵaǵan erlerdiń esimin jańǵyrtý jáne tarihi ádildikti qalpyna keltirý baǵytyndaǵy júieli jumystyń mańyzdylyǵyn atap ótti. Ministrler osy baǵyttaǵy jumystardyń baǵdaryn aiqyndady.
Sonymen qatar taraptar eki eldiń teatr mekemeleri arasyndaǵy yntymaqtastyqty damytý, beineleý óneri jáne animatsiia salasyndaǵy bailanystardy arttyrý máselelerin talqylap, Qazaqstan men Resei kórermenderiniń ulttyq kinoǵa degen qyzyǵýshylyǵy artyp kele jatqanyn atap ótti.
"Qazaqstan men Resei arasyndaǵy mádeni yntymaqtastyq belsendi damyp keledi. Birlesken tabysty jobalar, gastrolder men halyqaralyq festivalderge qatysý bizdiń ortaq jetistigimizdi dáleldeidi. Biz teatr, mýzei jáne mýzyka salasyndaǵy yntymaqtastyqty damytý úshin júieli jospar qura otyryp, ózara bailanysty nyǵaita beremiz", — dedi Aida Balaeva.
Kezdesýge sondai-aq Resei Federatsiiasy Prezidentiniń halyqaralyq mádeni yntymaqtastyq jónindegi arnaiy ókili Mihail Shvydkoi da qatysty. Ol aldaǵy mańyzdy oqiǵa — "Astana Opera" Qazaq ulttyq opera jáne balet teatrynyń Reseidiń Úlken teatryndaǵy gastrolin atap ótip, onda "Abai" operasy sahnalanatynyn tilge tiek etti.
Kezdesý sońynda teatr jáne mýzei isin, kreativti indýstriialar men mýzykalyq bilim berýdi odan ári damytý josparlary talqylandy.
