Biyl 1 mamyrda Maqtaral aýdanyna jaqyn Ózbekstanda Sardoba sý qoimasy jarylyp, tótenshe jaǵdai jariialanǵan. Sonyń saldarynan Túrkistan oblysynyń Maqtaral aýdanynda 845 úi, 3 mektep, 5 balabaqsha, 4 meditsina ǵimaraty men mádeniet úii jáne 54,7 shaqyrym kópir men joldy sý alǵan. Munan ózge 7639 ga egistik sý astynda qalǵan.
Osyǵan bailanysty Qazaqstan Ózbekstanǵa narazylyq nota joldap, Túrkistan oblysynyń 10 aýylyn sýǵa ketirgen Sardoba sý qoimasyndaǵy apat jaily tolyq aqparat berýdi talap etpek bolǵan.
Qazaqstan aqparat quraldary ekologiia, geologiia jáne tabiǵi resýrstar vitse-ministri Sergei Gromovtyń sózinshe, halyqaralyq norma boiynsha, shekara boiyndaǵy sýǵa salynatyn gidrotehnikalyq qurylys jaily shektes memleketterge habar alysyp, ózara kelisilýi tiis. Al Sardoba sý qoimasy Qazaqstannyń kelisiminsiz salynǵan.
Ózbekstan Sardoba sý qoimasynan zardap shekken Qazaqstan eldimekenderine tehnika jiberip, zardabyn joiýǵa kómektesken edi. Sý qoimasynyń jarylýynan Ózbekstannyń óz jeri de zardap shegip, ondaǵan myń adam úi-jaiyn tastap ketýge májbúr bolǵan.
Aqorda habaryna qaraǵanda, búgin 6 jeltoqsanda Qazaqstan prezidenti Qasym-Jomart Toqaev Nur-Sultanda Ózbekstan prezidenti Shavkat Mirziiaevpen keńeitilgen quramda kelissóz júrgizgen.
Qazaqstan prezidenti Qasym-Jomart Toqaev eki memlekettiń ara qatynasyna "qazaq-ózbek yntymaqtastyǵy barlyq salada buryn-sońdy bolmaǵan shyńdarǵa kóterildi" dep baǵalaǵan.
Qasym-Jomart Toqaev pen Shavkat Mirziiaev kelissózder qorytyndysy boiynsha Qazaqstan men Ózbekstan arasyndaǵy odaqtyq bailanystar týraly deklaratsiiaǵa qol qoiǵan.
Búgin Qazaqstanǵa resmi saparmen kelgen Shavkat Mirziaev biyl ekinshi merzimge prezident bolyp sailanyp, 6-qarashada ant qabyldaǵan edi. Batys baqylaýshylary Ózbekstandaǵy prezident sailaýy sailaýdyń básekesiz ótkenin aitty.
Shavkat Mirziiaev 2016 jyly avtoritar basshy Islam Karimov qazasynan keiin prezident bolǵan. Islam Karimovke qaraǵanda jumsaq saiasat júrgize bastaǵan Mirziiaev saiasi jáne ekonomikalyq reforma júrgizge ýáde bergen, biraq basym bóligi oryndalmaǵan.
